曾經住過荔枝角，曾經非常唔鍾意呢個地方，而家久不久都會過嚟行吓。
仲好記得嗰陣時荔枝角乜都冇，想搵間好少少嘅餐廳都冇，D2 place開幕後，都搞咗好耐先至到今日有返啲起色有不同嘅餐廳進場。
以前剩係得間西班牙嘢同日本嘢就撐晒成個大局，而家唔同哂。
喺呢個商場，走肉素食研究所係我bookmark咗好耐嘅餐廳，廚十三又係想食好耐都未去到，呢一晚先拔頭籌試咗一間身邊幾個朋友都讚嘅Up a notch。
首先要講餐廳位置有啲入，不過就正正係走肉素食研究所後面。
餐廳都幾大，而且路線唔似係太貴，最重要係個廚，來自廚魔Bo innovation，你未食已經有啲信心啦。
可惜當晚要揸車，唔係飲Cocktail飲下酒應該會開心啲，叫了兩杯mcoktail，老婆個杯牛油果沙冰，完全係佢嘅心水，至於我杯沙冰，不過不失。
牛油果帶子塔，你無聽錯又係牛油果，一個人追求口味嘅極致，飲完杯野都唔夠，都要點多個帶子塔做前菜，幸好，幾好食。
前菜出色的有海紅蝦薄切，幾得意，夠新鮮，未試過呢種口感。
水牛城雞翼同黑松露薯條都係最精彩的送酒物，L先生杯白酒，令我十分眼紅。
UAN係呢度嘅推薦，好多鬼佬自己都可以食到一塊。個件burrata加巴馬火腿和火箭菜，大份到嚇死你，加上薄薄的薄餅，正好配合。
店方推薦的24小時慢煮豬腩肉，賣相一流，吃下去又不會太過油，真心不錯。
相反點了封門柳無豬腩肉咁出色，可能之前吃過不少更濃味的封門柳，呢個相對簡單，但以二百多的價錢，絕對值回票價，你自己整一定無咁好。
點了幾個今日的special ，Sauteed Rumpa Clams，金不換炒蜆意粉，好有驚喜，不過略嫌蜆唔夠新鮮，唔夠好食。
沙薑雞意粉，係當日嘅signature推薦，好新穎的手法，你會想起Bo innovation嘅影響，不過，味道較淡，我呢d愛好重口味，我就夠得濃味點會好少少，最好條條意粉都重沙薑味就更好。
L推薦的慢煮龍蝦配自家制闊麵，龍蝦肉非常juicy ，肉質又淋，柔軟如那些俄羅斯體操女朗一樣，自家制闊麵從來都是配龍蝦的好朋友，呢碟又係幾秒就被消滅嘅系列。
可惜暫時未有甜品，於是最後飲杯咖啡，同朋友談近況，剛好。
聽講呢度開左一個月依然火爆，要黎記得訂位。
如果時光倒流十年，我想，食完番屋企易好多，不過，如果真係倒流十年，我還會坐在這嗎？
可能就如林家謙說，除非我有預知的超能力，而難題是時光未許倒流，明日只可向下流。
我想如果倒流，我未會在這個平台寫野，或者，人生會同而家不同得多。
Up a Notch Homemade Pasta & Pizza
荔枝角長義街9號D2 Place1期3樓301號舖
沒有留言:
發佈留言