哥老官重慶美蛙魚頭：上海人壽

之前每年蟹季節都總會去一次上海，還記得前年同阿媽去旅行，主力食蟹。

有一晚食蟹食到有點膩，我就開大眾點評，睇吓大家有乜嘢推薦，搵下靈感食下其他野。

然後有間網絡人氣火鍋店，叫哥老官，聽聞排幾個鐘係等閒事，於是避開人潮，凌晨12點去打邊爐，阿媽飽到叫救命，我就覺得好好食，到今日都好記得，有機會，值得再去。

當我知道香港開咗分店，就立刻bookmark 呢間餐廳，找機會去，前天，飛雲終於來臨。

招牌牛油味呢個火鍋，係焦點，中間嘅青蛙其實就係成舊牛油，打完卡影完相就放落去，個鍋底即刻又香又辣。

餐牌上沒有嘅新疆紅柳枝羊肉串，今日剛剛出，味道食到大中原嘅氣味，好食，飲啤酒必點。

特色牛蛙係招牌，同喺上海食嘅的確有啲分別，但係呢度嘅田雞嘅肥美，香港真係未食過咁正。

招牌空運毛肚，又係麻辣鍋必吃自選，正。

清純鴨血，店方話佢哋都揀咗好多唔同種類嘅鴨血入貨，試左幾隻，最後先選到呢款，不錯，當然沒有平時台式嘅嫩滑，但也不錯呀。

千張豆皮，都係麻辣最好朋友，講起佢，萵筍片又點可以錯過。

放學小肉總共有30串，絕對係送酒一流嘅極品。

我無食呢個水庫花鯉魚頭，不過同枱嘅兩位都話味道不錯。

聽干貝鹹蛋黃蝦滑呢個名，個個都會有興趣想食，咬落去，真係好堅，蝦肉勁澎湃，而且鹹蛋黃味非常濃烈，仲有好強嘅干貝香氣，口感好複雜。

牛筋丸最普通，老實講，無特別想食，可以不叫。

卡真酥肉也是店方推薦 ，不過肯定呢個係超肥嘅肥肉，如果你夠瘦，叫一碟送酒吧。

巴蜀手工苕粉當然不能錯過，唯一奇怪點解佢會將個苕粉分成一半，影響咗佢吸收麻辣湯底嘅口感。

招牌烏雞卷，呢個係佢哋特別推介，你睇個樣真係完全諗唔到用上咁多工序黎整嘅烏雞卷，味道口感都好特別。 小郡肝同樣係串燒嘅樣子，不過差啲以為係即食，原來都要煮熟佢先食得，又係送酒一流。

最後我都要再加多一個老成都人氣香腸，個樣完全係一條條臘腸咁嘅樣，大概味道應該都會幾肥幾膩，但沾上了麻辣火鍋湯底之後，出奇地又唔會太肥。

食咗咁多嘢每人四百幾蚊，唔算好平但係係射程範圍內，不過，最好係因為呢度啱啱試業，開咗一個月到，仲未有酒牌，我哋帶咗好多啤酒 sake去飲，不用開瓶費，成件事就正好多。

我還記得，在上海宵夜的那個晚上，同樣飲啤酒，那種快樂。原來突然去旅行一件咁簡單嘅事都咁遙不可及，看不到將來。

還說下次做更好，誰料這刻是尾聲，我們都應該及時行樂，誰知道明天會發生什麼，就不要多想，就這樣醉在哥老官吧。

哥老官重慶美蛙魚頭

尖沙咀厚福街8號H8 1樓