Amelia: 還有未完的心願

因為食物關注組的風潮，再次有人推薦呢間Amelia。

話說因為有人讚呢個龍蝦手工意粉非常精彩，就因為呢個原因，我再次來到年多沒有來過的Amelia。

為嘅就係試吓個個都讚嘅手工意粉同埋海膽飯，仲有另一個朋友大力推薦的日本甘鯛魚。

上次經驗都唔錯，簡單食咗幾個菜式雖然唔係話讚嘆到天上有地下無，但係都算remarkable同會有印象，特別係個香烤八爪魚，食過一定會難忘。

今晚同樣二個人來吃一個簡單晚餐，食嘅都係招牌菜式。呢度絕對唔係走fine dining嘅路線，我覺得反像那些意式小餐館，飲杯酒，吃下小食，談談天咁就一晚。

唔會坐低又有前菜又有麵包飲過湯搞幾個鐘都食唔完，個種爽朗同Cozy，係海港城定位不錯。

日本甘鯛魚，配上螢光魷魚同墨魚汁，那個甘鯛魚皮炸過後，特別香脆，又令我想起前日在Wing吃過Cher Vicky的那個魚，不過那餐飯滿佈惱火，下次再詳談。呢度菜以呢個價錢來說，都算幾好食，全身滿佈墨魚汁嘅螢光魷魚，和甘鯛魚襯得幾唔錯。

另一個前菜係巴斯克鱈魚下巴肉，個樣就真係普通，配合馬鈴薯同埋德式麵團，鱈魚下巴肉口感非常出色，絕對係外面好少見。

第一個主菜選擇左北海道海膽燴飯，一盤綠悠悠嘅蕃茜叫人非常搶鏡，想不到海膽才是主角，加上牛筋同多種嘅海鮮雜燴撈埋一齊，感覺非常良好，基本上每啖飯都食到海鮮，北海道嘅海膽固然精彩，何須用筆墨形容？

今晚嘅主角係法式辣龍蝦汁鮮龍蝦手工意粉 ，我個人覺得味道唔錯，反而喺香港意粉關注組，有人大讚，都有人話呢個意粉麻麻地，我個人覺得意粉的煙韌度都做得非常好，個辣龍蝦汁亦都非常之搶眼，而鮮龍蝦肉又滑又爽 ，以三百幾係海港城賣，合理啦。

尾聲當然要食個甜品，滿有特色的新派Tiramisu 叫人心花怒放，唔只好睇，仲要幾好食，附近兩枱都用來做生日蛋糕，呃like能手。

可惜太飽，如果唔係都想外賣佢嘅芝士蛋糕走，下次多啲人再留名試吓其他嘢。

執筆之時，剛剛見到佢有一個新Menu，都好似好吸引，似乎還有太多未了嘅心願，還是快啲再約人過嚟食最實際。 Amelia Hong Kong 尖沙咀廣東道3-27號海港城海運大廈地下OTG63號舖