大堂酒廊：「幸福綠園」

兩個星期前才到過九龍香格里拉酒店過週末，冇諗過咁快又返嚟。

無辦法，因為可以以全港第一個媒體為大家介紹呢個全新嘅季節聯乘SABON限定「幸福綠園」下午茶，值得再來和朋友過一個寫意下午。

好少特別介紹下午茶afternoon tea，但通常聯乘品牌都會提起對下午茶嘅興趣，碰巧係太太喜歡嘅以色列品牌SABON，更加沒有不去的理由。

始終唔係少女，我對下午茶嘅認識真係唔算多，都唔知道呢度鼎鼎大名嘅鳥籠原來咁出名，望住海景，係呢個咁舒適嘅環境，的確唔錯，而且今次嘅Tea set都幾好食。

如果睇完有興趣，記得呢個tea set會喺5月3日到6月30日期間推出，睇完有興趣記得唔好今日就衝過去，呢個weekend仲未供應㗎。 今次嘅下午茶味點用上大量水果同埋茶做主角，同呢個SABON全新限量抹茶精粹系列入面嘅清香調子互相配合。

最開心嘅係每個下午茶套餐客人可以獲送滋潤護理禮包一份，有一支茉莉沐浴油同埋茉莉絲body milk，仲有免費手部護理嘅潤膚乳液試用裝換領券一張。

講番野食，一定最欣賞鹹點，龍蝦西芹伴牛油軟包，非常之出色，呢排佢哋嘅bakery紅透全港咁出色，你已經可以想像到個牛油軟包幾好食。

另外慢煮三文魚醬配魚籽抹茶班戟都好特別，魚籽嘅鮮味配上柔軟嘅慢煮三文魚，絕對唔係平時硬梆梆嘅班戟可以比較。

燒鴨抹茶卷，配搭有趣，我自己幾鐘意，不過前者出色得多。

車厘茄伴意大利芝士香草醬汁就非常開胃，我建議先食，食錯左次序，相對會失色左。

甜點也不輸蝕，茉莉花茶忌廉半紅桑子洛神花果凍同芒果慕絲，都係靚得來味道都唔錯。

相對法式檸檬餅伴柑橘果凍及香橙慕絲就水準正常，不過女士就一定喜歡。

點題作薰衣草朱古力慕絲配香蕉蛋糕及藍莓係我最鍾意嘅甜品之一。另外，抹茶蛋糕配白朱古力慕絲都幾可愛，又係好得人歡心的味道。 當然不能錯過英式酥餅，自家烘焙又點可以錯過。最重要係呢度嘅下午茶會有一份新鮮時令水果作結尾，同之前食過嘅所有下午茶對比，呢度的確有少少分別，細心少少同豐富少少。

飲品方面，當然可以選擇咖啡或一系列香格里拉招牌茶品，如果有興致加$88已經可以飲杯法國香檳。

以下午茶來講，都幾深刻，有興趣記得快d訂。

九龍香格里拉大酒店大堂酒廊 尖沙咀麼地道64號九龍香格里拉大酒店大堂