鷹巢:十月不止大閘蟹

可能身邊唔同嘅朋友都話俾你聽佢屋企又好，出去食又好，都有一幅幅全部都係膏嘅大閘蟹，但係假設如果唔食大閘蟹，又有乜好食呢。

可能鷹巢知道總會有人未必食大閘蟹，反而出左個小眾d嘅奄仔膏蟹龍躉套餐。

$1688四位用，酒店餐廳來講可以話係幾平，仲要唔算難訂位，環境又舒服，又唔係啲好偏遠地方嘅酒店，去過一次之後，偶然都好想去番呢到，因為總有場合啱食。 記住，呢個餐真係唔係啲乜嘢神級，但係同屋企人唔使諗又要喺酒店坐得好食得唔錯，可以選擇呢到寫下俾大家睇。

金牌叉燒皇拼香蔥海蜇頭，其實好多酒店嘅叉燒都好出名，呢度唔敢講話係神級，但係叉燒夠厚身，甜度剛好。

入秋冬前食呢個真心得，生拆蟹肉冬茸羹滋潤得來啖啖入口都係蟹肉，好正。

愛魚人必定愛上荷香雲腿蒸龍躉球，完全冇骨嘅龍躉球配上荷葉香又真心幾好，不過要快啲食，唔係好快就會無哂，個個搶因為個龍躉皮煙韌得不行。

重點係呢個薑蔥粉絲奄仔膏蟹煲，嗰兩隻奄仔蟹都幾大隻，而且膏蟹當然有唔少好澎湃嘅膏，但最緊要嘅就係啲薑蔥粉絲吸盡兩種唔同蟹肉嘅精華，好得，絕對係今晚嘅重點。

食完啲咁濃味嘅嘢，當然要食番清清地，魚湯鮮蟲草花浸時蔬，特別係蟲草，令成件事都健康咗。

唔係好明點解用大澳牛做主角，唔通大澳牛好出名？我不知道，不過個炒飯算炒得唔錯，至少你食到鑊氣，當晚仲要有飲宴，你就知道呢度個廚房都算幾有水準。

桃膠八寶茶好多桃膠，而家八寶茶味道原來同佢都幾夾。

記得上次去某間五星級嘅酒店，大廚又喺度，但係服務食物水準都唔得，換來嘅feedback 係因為有宴會，或者可能我唔係識得大廚，所以冇特別去睇我餐飯有冇出事，今晚求其食飯，同樣撞正飲宴，我求其叫個餐又唔見得特別出事，有時食嘢都真係好講緣份。

鷹巢  旺角豉油街2號香港旺角希爾頓花園酒店2樓