2020年10月9日星期五

紅花會:不如整局辣聚?

又係ViuTV的禍吧,在節目中看到葉世昌師傅的水煮魚後,就對呢個餐廳好有興趣。

以私房菜做主打,菜式都係以川菜為主,我未試過其水準 未夠膽食呢到提供嘅私房菜,咁不如試吓散叫先?


當晚去到呢間咁新嘅餐廳都坐得大半滿,仲要喺席間見到廚房不斷進進出出不同好大堆頭菜式運送去樓上私房菜的層數,我想大概應該質素唔會太差。



不過首先第一樣野要投訴嘅係餐廳嘅通風系統真係麻麻,我哋坐咗兩個鐘,廚房煮嘅川菜個味道滿佈全間餐廳,令我地個個都係咁咳,呢個問題絕對要正視。


唔知其他樓層係點,但當晚三樓就有呢個問題存在。


由於第一次食,選菜方面都係隨心,好想食水煮魚,但因為家人唔係太食得辣,還是叫了溫和的老檀酸菜桂花魚,相信同樣試到佢嘅手勢。



非常大盤,份量絕對十足,飲一下湯,又唔會太過油,桂花魚滑是自然的事,最重要係那味覺會叫你印象深刻,就像在深圳吃太二嘅感覺一樣。



我唯一覺得唔夠好嘅就係寬粉數量太少,但加上那些芽菜配料等等夠多,彌補左個心靈空虛。



可惜今天還是吃不了葉世昌師傅的水煮魚。



前菜叫了香油萵筍絲,絕對吃到非常高嘅水準,萵筍絲切得好幼細,加上了香油的獨特香味,只想叫多一碟來吃。



另外點了另一前菜口水雞,呢個絕對係驚喜之作,非常惹味,平時吃口水雞,個雞夠嫩夠滑就得,點知個醬汁係驚喜,好食到要特登叫碗飯過嚟送。




茶燻樟茶鴨,聽講都係餐廳嘅名作,點了半隻,水準甚高,特別係茶香好濃,此刻如果有威士忌或者紅酒送,成件事完美得多。





最尾又點可以錯過擔擔麵,同平日花生醬味道好強嘅湯底唔同,呢個相對較為辣同惹火,麵條雖然不是非常彈牙,但都算係中上程度嘅水準。




食咗咁多樣菜式全部都有板有眼,下次絕對可以試吓私房菜。


搞局辣聚,有冇人有興趣?



PS好搞笑,本身食完呢餐飯之後,第二日就想訂下星期晚私房菜,點知電話打咗全日都打唔通,問返有朋友識得呢度嘅員工,佢話原來電話壞咗,好奇怪,唔知大家有冇試過打咗全日電話都打唔通,我試左whatsapp,餐廳電話都唔到,可能短期內冇乜緣份食佢個水煮魚吧。


紅花會 
灣仔謝斐道303號凱聯2樓



沒有留言:

發佈留言