大概應該有一段時間冇食過自助餐，疫情關係，呢段時間越嚟越食少食自助餐，加上人老咗，胃口都越嚟越細。
有時如果朋友咁啱約，又或者真係有好吸引嘅主題先至會考慮，剛巧朋友M小姐星期日返工，下午茶有空檔時間，問我有冇興趣一齊食下午茶自助餐。
Tea buffet呢樣嘢真係好多年都冇食過，我才記得原來有一種自助餐叫做Tea buffet，太耐冇見，聚聚食下野是必要的。
剛巧是次主題係日本山梨及長野縣白桃，幾吸引，幸好剛剛捉緊到呢個主題嘅尾巴，食到又甜又多汁嘅白桃。
好耐冇嚟過先知原來好多人都好鍾意食下午茶自助餐，冇辦法計哂優惠，二百幾到一個人，啲嘢食非常之多選擇。
當日都好多人，攞嘢食度度都要排隊，非常墟冚。
我諗最吸引嘅係一定係有唔少好似豬扒、雞翼、鴨胸、餃子呢類夠你飽肚嘅主食，全部都煮得唔錯。
當然都不能錯過有好多沙律、意粉、炒麵、冷烏冬、冷麵，愛澱粉質嘅人必選。
另外也有不少點心選擇，燒賣出奇地幾好。
最正嘅係即煮嘅車仔麵檔，可惜當晚好早食晚飯，唔係一定會食多碗。
當日仲有我最鍾意食嘅碗仔翅魚肉同水煮魚。
不過最精彩嘅係一定日本山梨及長野縣白桃為主角嘅甜品。
一系列嘅甜品如紅豆麻薯抹茶麵包三文治，白桃杏仁蛋糕，白桃果凍，不同的白桃同抹茶甜品，食落去都唔錯，平時夜晚自助餐好主力都會食海鮮、魚生或者生蠔，但係下午茶嘅關係，回本壓力冇咁大，試吓唔同嘅甜品原來又唔錯。
感覺不錯，特別係其實食完之後，真係晚飯都唔使食，怪不得咁多人。
沒有留言:
發佈留言