2020年10月8日星期四

Homeland:難忘的啤酒釀全雞

聽過Homeland呢個大名已經很久,一直也想朝聖,可惜,大埔對我來講太過遠,於是餐廳在我的to eat list放左好一段時間。


呢間非常出名嘅黃店,一直好受歡迎,知道佢係大角咀啱啱開咗分店,於是立刻去試吓。



剛剛這個星期ViuTV嘅飲食節目再介紹後,我估呢度人氣只有更加鼎盛,更加受歡迎。



大角咀嘅分店,有幾樣分店限定嘅食物,如果去得大角咀嘅分店應該不能錯過。


六點晚上去到,已經坐到半滿,真係幾誇張。




睇餐廳個外表,完全估唔到係一間走實力派路線嘅餐廳,唔講你以為係好女性化嘅網美咖啡店。





黃店實力係特別厲害,成間餐廳處處都有黃到不行嘅痕跡,怪不得咁多人幫襯。





四個人坐低,由於不是太肚餓,我哋點了一個雞一個飯一個意粉。


見到呢度有唔少手工啤酒嘅選擇,全都係本地創作,由非常之受歡迎嘅板藍根到單眼佬都有提供。




當晚要揸車,飲不到酒,唔可以會一會單眼佬,可惜。


如果你同幾個朋友來就最適合,大家飲下酒食下其他前菜最好。


等食時間就耐左少少,由坐低到有嘢食都要等大約2025分鐘時間。如果大家嚟食下前菜,再飲埋啤酒,慢慢等慢慢傾吓計,感覺應該好得多。


第一個吃嘅係冬陰功海鮮寬條麵,擺盤非常精美,但份量就唔係太大碟。



冬陰功唔會太過濃味,亦都唔係好辣,冬陰功味係意粉中絲絲散發出香氣。



意粉雖然唔係勁有咬口,但係個Texture感覺不錯,軟綿綿嘅感覺,而且出色嘅係呢度嘅意粉全部都係自家製。



蝦肉爽口,整體不錯,只不過沒有太震撼的回憶。



第二個西班牙海鮮炒飯都係店舖限定,呢個飯最好嘅係,吃下去唔會太過油膩,而且鋪滿海鮮,蝦同墨魚都好做得不錯。



如果個飯味道濃味一點會好少少,如果加上西班牙辣肉腸,應該會更加完美。




然後試左今晚嘅主角,惹味啤酒釀全雞。呢個雞個樣,氣勢十足。



可能你喺出邊見過好多次咁樣嘅雞,不過呢個雞同你之前食過嘅係有啲特別。



呢隻啤酒雞煮法唔係咁簡單,廚師用上唔同嘅蔬菜配料切成絲,再加入蜂蜜話梅手工啤酒釀成嘅汁將隻雞massage,啤酒完全滲入成隻雞當中。




然後用上一個特製器皿,加上剛剛切絲嘅蔬菜同手工啤塞入去隻雞裏邊,再用蒸同焗嘅方法來烹調而成。



出到嚟隻雞真係好熱辣辣,賣相非常之正。




店方提供手套俾你,可以即刻用手撕開隻雞,不過千萬要小心,真係非常之熱辣辣。


雞髀位又嫩又滑,加上肉汁,一流。



成隻雞都算幾大隻,整體上都做得唔錯,每個部份都吃到應該有嘅肉汁,加上其他嘅蔬菜配料,混合起來都好正。


全晚最難忘可以話係呢個啤酒釀全雞,執筆呢刻,都想即刻再食。


呢度越夜越多人,記得一定要訂位。如果你為咗隻雞而黎,每日只限定幾隻,記得要預訂。


以今晚嘅水準,絕對值得再來捧場,前日再睇返個節目,原來豬手都十分出色。下次,擇日再戰豬手和叫多次雞吧。



Homeland (牡丹大廈) 
大角咀大角咀道55-65號牡丹大廈北座地下9-12號舖


沒有留言:

發佈留言