甬府: 寧波之美

上次食寧波菜，應該係寧波旅港同鄉會，都十年前，那次經驗不錯，大部分都係家庭式的菜式，吃得不錯又唔貴。

甬府定位當然不同，同我哋最出名嘅新榮記一樣，都係以走fine dining 為主嘅路線為主，甬幫菜。喺江淅派系嘅中國飲食文化當中可以話係重要一員，而作為內地高端餐飲代表之重要餐廳之一嘅甬府，落戶香港當然一定唔簡單。

未接觸過寧波菜，又未試過甬府如我的你，食Tasting Menu就最好，聽講呢個餐單係新推出的，鍾意唔諗嘢嘅人就最適合。

前菜四個，招牌十八斬，寧波煒菜，手撕鳗筒同泡制菜梗，可以話未登場，先興奮。

招牌十八斬當然係最出色嘅同埋最搶鏡嘅菜式之一，我每年一入冬，就用現代嘅冷凍技術係零下190度保存蟹狀態等大家可以全年食用到呢個生醃梭子蟹。一隻蟹斬開18件擺盤非常精緻，醬汁唔會話好似韓國醬油蟹一樣勁濃味，但係你會食到蟹膏嘅甘香同甜，呢一個又係不能錯過嘅菜式。

寧波煒菜，可以話係每家都會煮嘅家常菜，用嚟送飯應該幾好，不過佢哋話因為太多嘢食千祈唔好送飯。

手撕鳗筒，顧名思義，你見到都知道係乜，手撕鰻魚都知道係非常之講究手工，食嘅時候要小心都會有少少骨。

泡制菜梗睇個樣以為普通到唔普通，但係絲絲嘅辣香令人會念念不忘菜梗呢個菜式。

湯類嘅選擇係呢度另一名物，蔣公芋艿羹，朋友叫我地估，佢究竟係乜嘢，因為話食多得一定會爆膽固醇。放上枱其實已經估到，一股豬油香氣漂過，在火光中翻騰，入口的豬油同芋香，好令人難以忘懷，食過唔會唔記得，呢個絕對係要點要吃的菜式。

脆皮水潺，睇個名就唔知係乜，說穿了就係九肚魚，炸過之後肉質都非常之嫩滑，同你平時喺大排檔食嘅完全係兩個層次。

每天從寧波運貨過來的白鱗鯧，聽過係好珍貴的菜式，至少香港好少有得食到。雪菜筍絲燒白鱗鯧，以湯嘅形式上，愛魚人一定會好期待，影完相後幫你分，先飲一口湯，那清美之美絕對不能不提，好正，不過我覺得最好食嘅竟然係啲雪菜，鮮甜度比平時出名嗰啲雪菜肉絲嘅名店更好。如果佢好似頭先個羹咁用火烘住，件事會好好多。

海味麻辣豆腐，以好熱嘅一隻碟，麻婆豆腐放上去嘩啦嘩啦咁煎熱起來，呢度嘅麻婆豆腐用上好多唔同嘅蝦同海參等等，味道唔算太辣。忍唔住一定要送飯，我好唔客氣送足兩碗。

红燜拆骨豬手個人相對覺得普通左少少，不過豬手嘅骨膠原都絕對令你不得不欣賞，另外有海帶同小饅頭送個炆豬手汁，又係一絕。

尾聲一定要食個清炒時蔬，去除前段嘅所有油膩和飽肚感，而且個菜真係好甜，連送菜嘅湯都特別甜過人。

寧波湯圓同生果做結尾，最出色嘅一定係個湯圓，每日新鮮包俾你，只有用清水來送個湯圓，湯圓泌出嚟嘅芝麻，令人又愛又痕。今日去到你到已經好飽了。

$4,888，四個人嘅tasting dinner，如果以呢度嘅氣魄同質素，你自己逐樣叫一定唔止呢個價錢，仲要可以試到好多個唔同嘅菜式，以$1222一位的價錢就可以吃到最出名嘅首本名菜，唔駛諗。

當然未包茶位費和服務費，你唔好又攞呢篇文嚟講個價錢有分別，我嘅讀者應該有少少質素。另外一提，加多HKS618一位就可另配3杯品酒師搭配的葡萄酒，當晚飲咗幾隻都幾好嘅酒，唔特別詳談了，但都配得不錯，例如當晚嘅貓鬚配九肚一流，有興趣嘅記得預訂。

甬府 灣仔駱克道20-24號金星大廈地下2號舖及1樓