中庭：大閘蟹第二擊之金秋蟹逅

秋分時間，繼續係大閘蟹的時間，今日我又為你介紹膽固醇餐啦。

由11月1日起，會展餐廳中庭就開番星期一到三晚市，而為左迎接番平日晚市，餐廳特此加推一個優惠價食呢個金秋蟹逅晚市套餐，不過，當然一到日都有，只不過，價錢有少少唔同。星期一至四，港幣550元一位；星期五至日：港幣688元一位，以當晚吃的水準來計真心超值。

對大閘蟹有興趣嘅，一齊睇下有乜食啦。

先來的蟹粉海膽二弄同涼拌蜜荳蟲草花，又靚又好食，二弄有蟹粉海膽腐皮卷及海膽蟹肉凍，最喜歡的鮮海膽蟹肉凍非常吸睛，呢個前菜絕對先聲奪人，好似藝術品一樣，腐皮卷就相對普通樣子，但實力搭夠，春卷入邊竟然會有蟹粉海膽嘅感覺好新奇。

上次同樣食蟹皇花膠嘅羹係十里洋場，呢度嘅蟹皇玉帶花膠羹就清少少，唔會咁飽，食完唔會咁膩，但其實羹入面有帶子，露筍，雖然話清新，但其實食落都好滿足。

如西餐般上嘅蟹粉扒虎，滿佈蟹粉嘅瓜莆襯上了幫你拆哂嘅蝦，加一抹蟹粉，又清爽的瓜又有滿滿的蝦肉感覺，此刻我想來的是一碗白飯。

蟹肉鱈魚金福袋，個福袋外皮非常之薄而又有勁甜嘅蛋香，入邊全部係滿滿嘅蟹肉同鱈魚肉，豐滿得令人好深刻。

相對簡單的上湯浸時蔬，有鮮百合，菜，杞子，有腐竹，最緊要個湯清新得很。

蟹粉時間必食的蟹粉小籠包，當然不會錯，在肉汁和蟹粉的爆炸感之間，係幸福的感覺。

櫻花蝦薑粒炒飯，加上薑粒去達到驅寒效果，櫻花蝦加上粒粒靚到不行的炒飯，太完美。

呢個蟹粉宴都真係好足料，個人特別喜歡幾個菜式，不過，由於今日多人食可以試多幾樣野，先點多隻大閘蟹。

點餐的可以加大閘蟹，重約5.5両，額外加港幣280元，每份套餐只限加一隻。最重要嘅係呢度會拆咗一隻大閘蟹俾你，而當日由於我太多口，依度嘅哥哥仲即席示範示範拆哂成隻蟹嘅技巧俾我睇，完全係殘廢餐，有興趣嘅你可以憑呢張相研究吓點拆，不過聽佢講，網上面原來有好多教學，暖男要學下。

由於當日師傅回歸，當然帶咗啲首本名菜返嚟，今日就食左水煮桂花魚，滑到不行的桂花魚肉加上幼薯粉，湯夠不油且清，好好味。

最尾嘅薑湯圓，當然係最好嘅蟹宴甜品，小巧得來必定滿足。

幾個蟹宴推介，呢個都算為出色，想食嘅要快訂。

中庭 灣仔港灣道1號香港會議展覽中心1樓