喺疫情嘅時間，都少咗好多出街食，特別係最愛嘅打邊爐，呢兩個月，癮一起，都試左幾次外賣火鍋。
其中火鍋撚試咗兩次，最穩定最乾淨又最抵食。
加埋佢老闆前嗰排有捐錢，捐去邊唔駛講啦。
前排疫情緩和嘅時候，終於的起心肝去試吓堂食。
火鍋撚分店有好多，我選了中環蘇豪區，相對價錢最相宜，同一條街有間叫怡紅院嘅打邊爐，價錢貴得多。
當然，怡紅院走高檔精品路線，但火鍋撚走嘅係平實路線，平靚正，唔係好fancy，拳拳到肉，value for money 。
本來好想試佢哋嘅新沙嗲鍋，但係還是抵擋不了佢原味嘅誘惑，點了蜂巢豆腐白湯鍋，呢個鎮店之寶。
入邊嘅鴨紅同埋豆腐當然係不能錯過，一放低個鍋肯定要飲兩三碗湯先。
點了火鍋撚御用手切肥牛，仙氣十足，擺盤又靚，當然如果你捨得食嘅話，可以吃特級霜降牛肉，又或者平平地食安格斯肥牛，不過我取中庸之道。
點了呢個骰仔牛柳粒，要煮耐少少，牛味濃郁，愛牛的人一定鐘意。
另外點了另一個鎮店之作，法式龍蝦湯爆漿牛丸，呢個真係好得，咬下去爆出嚟嘅係法式嘅龍蝦湯，味道濃烈，之前都唔知道有呢樣嘢食，外賣都未食過，吃過一次之後以後食得火鍋撚就一定必點。
試咗黑松露墨魚滑和香菇貝鮑鮮滑，兩雄雙遇，都真係幾難分到高下，個人會喜歡黑松露墨魚滑的鮮味和香氣。
食得台式火鍋當然要吃老油條，襯白湯最好。
腐竹拼枝竹呢個係一個幾新嘅concept，兩樣都係我最愛又係吸湯最好。
限量嘅新鮮紫淮山，絕對要試，好味又高纖維，蔬菜類入邊最吸引一定係呢個。
貴妃蚌同珊瑚蚌，兩樣都要食。呢度最好係可以係半份同雙併，亦都係我好鍾意火鍋撚嘅其中一個原因。
我自己好想食寬粉，當然一定要叫一叫，又係湯作怪。
媽媽不吃牛肉，我哋特登叫咗個豬肉俾佢試吓，呢個極品黑豚肉令我想起了寬巷子，花之美態。
還有一個雜錦四寶餃餃拼盤，有水餃、雲吞、魚皮餃和韭菜餃，四個都水準高，各有所愛，人人都有得食自已愛的。
另外點了午餐肉菜甫餃，呢一個又係大愛，愛新奇刺激必點。
呢度嘅自家製飲品都唔錯，見推介左呢個龍眼菊花蜜當然要試吓。
尾聲再送個甜品，和無老鍋個風格真係堅似。
今次堂食嘅感覺比起外賣更加好，真係有眼不識泰山，今日先第一次食火鍋撚，失敬，安安飲食嘅出品都真係不錯。
除咗中環分店之外，仲有兩間旺角店同西環店，悉隨尊便只不過我覺得中環店好似容易有位少少，有機會就支持下啦。
沒有留言:
發佈留言