雖然市面上飲食市場已經大致回復正常，但係香港嘅自助餐好多地方依然實行半自助餐制。
呢個group嘅半自助餐都試過幾次，有朋友約，又唔使自己諗，又有得食，最好。
於是這晚便來到位於香港仔嘅Lis cafe。
當然自助餐從來都唔係啲乜嘢精美好食嘅嘢，講嘅係抵唔抵食，值唔值得去。
刺身及壽司當然有提供，三文魚、甜蝦、吞拿魚和不同的雜錦壽司也有提供，全部賣相都唔錯，而且加單都快，又唔會有漏單嘅情況。
外邊嘅前菜，海鮮都有不少選擇，不過今次來嘅重點反而係佢嘅主菜，當然如果一定要推介，一定不能錯過佢嘅凍蝦同蟹腳，我都食左幾碟，只不過，掛住食無影相啦。
主菜從來都係半自助餐嘅重點，當晚人多就可以食不同類的主菜，而且朋友選這餐廳嘅原因就係因為話啲主食好食，不如黎睇下有乜食。
先講的一定係燒美國西冷扒配松露肉汁，應該係好多人嘅選擇，西冷夠大塊，當然唔會同你講好似出面lawry一樣咁好食咁誇張，水準比平時嘅港式嘅扒餐好兩個層次吧。
朋友的燒澳洲羊架配迷迭香肉汁，非常精彩，個羊有少少羊羶味，而且燒得剛剛好，咬下去有肉汁四射，如果有機會你嚟到又吃羊嘅話，一定要食呢個主菜。
焗法國黃春雞配蘑菇肉汁，睇個樣麻麻，不過吃落去又不錯，黃春雞雞肉都幾嫩，吃到嘅係雞嘅油香，又係個句 以自助餐餐廳水準真係算不錯了，如果你期待以為自己會吃到Louise嘅質素，人黎，不如帶你上房訓下覺先。
愛魚嘅人一定會食呢個清蒸老虎斑，仲會送碗白飯俾你，餐桌上有兩位愛魚嘅女士都讚不絕口，不用5分鐘就將全條魚食到得番棚骨，我個人麻麻，不過簡單魚肉送上蒸魚豉油，成件事好住家，想到了黎明首《顧家》。
我自已私心可能太鍾意食海鮮，香煎大蝦配蒜香牛油汁舉腳說好，好正，大蝦夠大隻，而且蒜香牛油汁做得好好，唔會太鹹太過火，令隻蝦味道提升不少。
不過，啱啱讚完呢度海鮮好，薑蔥炒新鮮八頭鮑魚就有點失望，鮑魚夠大都應該幾靚，但問題係蒸過咗火，讚得多真係唔好，但如果你對飲食唔講究，你覺得自助餐冇所謂啦，都可以接受嘅。
甜品方面，哈根大師雪糕當然是走唔甩，其他包括有雲石芝士餅、荔枝布甸、咖啡朱古力布甸、士多啤梨布甸、香蕉蛋糕、士多啤梨慕絲蛋糕、北海道全脂牛奶布甸、鮮果焦糖燉蛋、雜果啫喱、軟朱古力蛋糕、紅菜頭菠蘿啫喱、朱古力慕絲、藍莓蒟蒻果凍及甘筍薑果凍配菠蘿汁等等，完全係花多眼亂，任你攞，而且搶手項目如咖啡朱古力布甸好快都有refill ，以服務質素來講，一點也不差。
總括來說，以半自助餐嘅質素，一個相對唔太貴嘅價錢，一班人食下傾吓玩下開心下係值得嘅，特別係南區嘅朋友咁方便，係不錯選擇啦。
沒有留言:
發佈留言