都不知幾時嘅習慣，而家勁鍾意食辣野。
小食、午餐和晚餐都好，都喜歡食下少少辣野，開胃得來又刺激，尤其鍾意食到大汗淋漓嘅感覺。
相信呢個絕對係喜歡食辣嘅人先至明白。
久不久都會有朋友搞下辣局，自己又會搵唔同嘅辣野餐廳去試。
今晚就介紹呢間麻辣燙，之前真係完全唔識呢間餐廳，朋友介紹嘅時候，佢話原來呢度曾經係有米芝蓮嘅推介，令我更加期待。
星期五嘅晚上，來到基本上高朋滿座，全部都係外國人，同隔離大館嘅酒吧差唔多。
當然你會立刻諗主力以外國人做target 嘅辣野夠唔夠正宗？會係乜嘢玩法。大家睇下今晚食啲乜。
前菜花生幾好食，雖然唔辣。
呢度嘅紅油抄手，出奇地勁辣。同好多中式地方提供嘅抄手唔同，這裏比較小巧玲瓏，又得意，肉不太多，你只感受到抄手入邊全部都係肉碎和辣椒香嘅誘惑，食完又唔會太過覺得肥膩同好飽，辣度就真係幾勁，好深刻，亦都證明咗呢度嘅辣唔係省油燈。
別不同燙雞片，不錯，雖然雞肉唔算滑，但係加埋炸菠菜，好食好好送酒。
麻婆豆腐可能係食辣野中最普通嘅食物，呢個阿婆麻婆豆腐，又係送飯一流，佢唔係死辣嘅一種，有一種濃烈嘅醬汁風味，也不錯，不過相對呢度嘅風格都係比較細碟，大食的可能會唔夠喉。
今晚嘅主角應該係呢個霸王辣椒軟殼蟹，賣相來說，怕辣嘅話應該會好驚，見到全部都係辣椒花椒等等，就估應該會好辣，老實說，個味道出奇地溫和，軟殼蟹啖啖都非常之好吃，而且炸得乾爽，完全零油份。
主菜則選上黑松露雞絲辣炒飯，基本上呢個同辣完全扯不上任何關係，對我來說，零辣度，不過相對來講，炒飯唔太油膩，也算乾爽，只不過我覺得較淋身，唔算係我最理想嘅炒飯味道。
尾聲嘅甜品選了拔絲草莓，呢個相對少見，個樣絕對好似藝術品一樣，雖然我一直唔特別愛甜品，但呢個都整得幾好食。
最後一提呢度嘅Cocktail全部都好出色，你同呢度嘅職員佢地都會特別去調教一啲適合你口味嘅cocktail俾你，今晚試左幾杯，今晚最喜歡嘅就係呢杯威士忌加花椒同rosemary，味道好精彩，辣度香噴噴，同時體驗到威士忌嘅香濃，愛杯中物嘅記得不能錯過。
當然如果你唔飲酒，都有好多解辣飲品。
得閒就再辣聚，大家有興趣試下嗎？
沒有留言:
發佈留言