7月6日,係國際炸雞日,大家當日有冇食下炸雞慶祝下?
食炸雞當然唔係淨係食KFC或者麥當勞,大把選擇,問題係要有新鮮感和特別嘅先好介紹,你話係唔係?
我反而想介紹當日去嘅呢間專賣炸雞嘅bar,係鼎鼎大名嘅the iron fairies 隔離,聽聞呢度嘅炸雞幾出色,一於試下。
當然係得蘇豪區,可能你會話呢度主要做外國人生意,咁炸雞又會唔會做得出色?
答案係不錯,一齊睇下有乜好食,也算係韓式炸雞同西式炸雞之間攞到一個平衡。
不過最出名係佢標榜用本地嘅三黃雞來做炸雞,呢個絕對有誠意有驚喜。
呢個炸雞set,有好多唔同款式,有雞翼,有雞柳,有雞扒三文治,再有薯角等等,各式其式。
最鍾意係呢個雞肉三文治,麵包烘得勁脆,入面嘅雞肉都好香好脆,飽肚之選。
呢度可以淨係叫一份雞肉三文治,同台灣嘅早餐一樣非常大份。
個人都幾喜歡炸雞串,啖啖肉完全唔使食到骨,算係炸雞懶人包。
雞翼又係好精彩,最能欣賞到佢嘅雞皮處理,又唔會太鹹。
基本上好食到即刻叫多咗兩隻炸雞翼來食。
最令人有新鮮感嘅一定係呢個炸雞翼配bloody Mary,如果你係血腥瑪莉嘅粉絲,你一定會好鍾意呢個配搭,食完飲番啖,好爽,而且呢度嘅血腥瑪莉酒精夠強,有時炸雞唔一定要配啤酒的。
當然如果你唔飲酒,其實都有好多選擇,呢一個西柚汁基本上台台都叫,透心涼之選。
喺蘇豪區happy hour的時候,如果你想食下野,唔一定要食生蠔,食下炸雞都不錯呀。
好似今日大部份嘅客人都係女士,全部都大啖大啖炸雞,另一手揸住支啤酒,好不高興。
疫情關係,蘇豪都少咗好多人,我諗如果疫情好返,呢度絕對係附近嘅一個好嘅蒲點。
沒有留言:
發佈留言