八號風球,你覺得酒店會唔會有自助餐食呢?
有人跟我打賭,說酒店就算十號風球酒店不會開, 本身約左食自助餐的今天晚上,我自己就覺得酒店一定唔會唔開, 所以我決定與朋友打賭,就賭一餐自助餐吧。老實說, 我覺得我贏硬, 就如係澳門賭大細連開五盤大你都會繼續追一樣的信心。
颱風與我們的生活息息相關,大家都好敏感如果打風會有乜好做, 本身知道今晚打風所以立即想睇戲,呢個絕對係香港頭號打風活動, 但朋友的一句挑機,佢話一定冇自助餐食,據我所知, 李氏力場只會影響港交所的活動,吃飯又點會影響呢。朋友咁堅定, 我們想想有冇又平又唔貴又唔錯嘅自助餐,突然,靈機一觸, 一通電話接到沙田帝都的2+2,唔夠一分鐘, 我已得到了一餐免費的自助餐。當然,八號風球, 自助餐亦都係唔會休息的。
選帝都的原因,食過一次宵夜自助餐,味道不錯,又平又抵, 朋友輸得咁慘,都唔想斬到佢一頸血, 這裡的自助餐五百多而又以龍蝦生蠔為主,實在抵。訂位時知道係有 特別theme,更加開心。
既然打風,早走早著。
自助餐,要回本一定係食海鮮, 而呢兩個月呢度個theme仲要係龍蝦和生蠔,於是老實不客氣, call的接埋朋友去又點話,打風地鐵一定好迫人, 仲要成日忍受個啲四點九遲來的風球, 全香港打工仔必定係地鐵迫到沙甸魚咁,於是輕輕鬆鬆鄧梓峰, 的士幾個字就到,可以準備大吃大喝一番。
一坐下,不用解釋,直去海鮮的櫃檯,海鮮係第一個目標。
這裡一個角落專為生蠔而設,今晚的主角係美國太平洋生蠔, 不用排太久,已經開定嘅生蠔每人三隻,非常慳時間。 太平洋生蠔的質素係自助餐任吃來說質素非常高, 柔軟的蠔肉creamy無比,海水味雖然不是特濃, 但其光滑細膩,滑到不行的感覺令我吃左足足一打。
波士頓龍蝦雖然沒有砌成山一樣澎湃,不過全晚refill不停, 大方得體,唔會好少有啲自助餐八點幾海鮮就會停止供應, 呢點值得一讚,龍蝦都算肥美,大部分都有滿瀉的蝦膏,不過, 人老左,從前在JW吃一打的豪情不在,今晚吃了四隻半邊的, 已經怕膽固醇的呼喚了。
其他的海鮮還有蟹腳,青口,翡翠螺,海蝦等基本入場券, 蟹腳雖然不是太肥美的類別,但海水味鮮味豐富, 青口也是肥美的比利時款式,我最愛的翡翠螺大隻到不得之了, 鮮甜之餘又厚肉,美中不足之處係有某幾粒會有沙, 海蝦也是肥肥大大,蝦頭也是會有蝦膏流出,啖啖肉, 值得吃完再去。
魚生的款式正常,八爪魚,北寄貝,希靈魚,呑拿魚,鯛魚, 三文魚,算係非常多的款式,不過為左吃多一點, 我沒有特別每隻都食,選擇自己喜歡的吃,希靈魚爽口而厚肉, 呑拿魚色澤光鮮,北寄貝則鮮甜而新鮮,大部分魚生都係有質素的, 並不是外間那些如爭鮮的質素可以對比。
壽司反而款式不太多,當中最吸引係蝦同瀨尿蝦壽司, 其他外表一般,不過兩隻蝦的味道都鮮甜得當, 值得食多舊飯去試試。
是次的龍蝦主題,基本上係天羅地網都係龍蝦為一個主角, 冷盤當然係波士頓龍蝦天下全勝, 但不少龍蝦味的熱食也是值得一吃的。當中, 最喜歡的是濃濃的海龍皇湯,龍蝦密度高, 在一口湯就能將舌頭被龍蝦包圍的情況下,可見十分足料, 兩碗都值回票價。
龍蝦鮮魷扒時蔬又係好似龍蝦鉗唔駛錢咁,任你攞,就驚你唔食, 西蘭花同鮮魷呢個配菜當然比下去。
還有當然係燒扇貝,淡淡的蒜香在扇貝裡融合起來,吃兩隻都唔夠, 只怪新陣代謝慢,唔係食一打都冇問題。
泰式香辣醬脆肉瓜炒豬頸肉,脆肉瓜完全滲透辣味, 豬頸肉卻有點肥,只吃脆肉瓜也不錯。
吃到這裡都已經飽了,別人出錢,我當然不用出命,年紀大, 吃少一點會健康點,最後來一杯熱檸茶, 這裡的好處就是咖啡餐茶任飲,你要幾多有幾多。
嘆茶時間,望望外面,也無風雨也無晴,多得颱風, 送給我一餐自助餐,送我完美的一個晚上。何時才與海鮮有約, 應該是下次去尖沙咀另一間平靚正自助餐,下次再談吧。
2+2 café
沙田白鶴汀街8號帝都酒店3樓
沒有留言:
發佈留言