呢件蛋治，係不同平台睇過幾多萬次。
如果你像我一樣，身邊有好多飲食博客，你大約睇相都知係邊間。
還記得之前好恨食呢個蛋治，平日無乜機會來到觀塘，難有緣份試到，直到有個客人Office搬咗嚟觀塘，先有機會吃第一次。
經常係朋友間傳來傳去，個個讚，長期都算人龍店，不過呢排相對人少左，好多朋友都襯呢排去左，正面評語居多。
呢度地方真係好麻甩，但係你來到，一定唔會錯。
平常番工有機會來見客，我都是自己一個人來，一個人真係食唔到啲乜，幸好今天我們一家四口來，實力大增。
特別係星期六，又撞正疫情，人唔多。
平時餐廳嘅招呼都已經唔錯，今日更加好。
餐廳嘅位置真係不好坐，廁所亦都唔係乾淨，相對係缺點。
來到海潮，你會發覺自己一定有選擇困難症，選擇多，呢樣想食嗰樣想食，一個人，特別無力。
不過呢度嘅老闆好鍾意推薦，如你諗唔到食乜，餐廳老闆會好似omakase咁會建議你食乜食乜。
當然不能錯過蔥花蛋治，薄薄外層包著另一層麵包，加上炒得好滑嘅蔥花蛋，烘底外層，點會不好吃。
呢個蔥花蛋治，有幾好真係睇相都知，還記得蛋汁係口蕩來蕩去的一刻。
蔥油手撕雞五香肉丁撈通粉我之前試過，今天佢再推介俾我哋食，當然風采依舊，蔥油配上強勁嘅五香肉丁，撈上通粉，鬥快搶攻你嘅味蕾，好正，當然配通粉較好，因為食完都覺有點油，如吃公仔麵可能更加飽。
呢碗又係老闆介紹，豬紅蕃茄肉丸冬蔭功米粉，未見過都未食過，不過整體味道都不錯，相對撈通或者煎米粉會出色啲。
相反，我記得吃過海潮的柱喉牛腩煎米粉係神級，可惜我哋仲有下場要去，今日叫唔到咁多，會太飽，下次有機會食嘅話一定要叫，真心推介。
蒜蓉餃子，大量嘅蒜蓉加上辣椒，包得勁豐滿嘅韮菜餃，點上辣椒和蒜蓉簡直係一流，當然如果你唔係韮菜或者蒜蓉或者辣椒嘅粉絲，我建議你都係唔好食，食另一樣野啦。
我想都唔使點講魔鬼奶油多有幾咁好，睇個款都略知一二，最緊要佢唔係真係死甜，那絲絲甜度，令人覺得好滿足，而且影相一流。
最後飲杯可樂咖啡，好滿足，呢度嘅可樂咖啡係應該全香港飲過最好嘅，剛剛好的甜度和完美的可樂和咖啡份量配搭。
呢間茶餐廳係呢區都算好出名，其實好多人都識亦都有好多人寫過，如果你剛巧未聽過又未睇過又未食過，又還未認識海潮，來吧，一定錯不了。
沒有留言:
發佈留言