雄記的關係，近來去荃灣的次數係幾年嘅總和。
可能因為呢排發現去荃灣交通非常方便，於是常常去下商場買野。
當然，無可能餐餐雄記同米線，荃灣也有好多嘢可以食，本身想食幾出名嘅江湖小棧，可惜，去Donki已經要排隊，還是選一些不用排隊的餐廳吧。
之前看到M小姐的page看到這間餐廳，千色匯的新開餐廳，相信沒有太多人知，知的原因都係因為網上有飲食雜誌拍左video推介佢。
我唔否認係因為睇左朋友嘅推介先過嚟，佢寫得應該不會太差嘅，最重要係價錢吸引，外表包裝都好對辦。
四個人來到，當晚已經係飲食新時代來臨，隔張枱先可以坐，幸好餐廳環境幾大，感覺非常寬敞。
呢排餐廳受歡迎一定係講社會責任，餐廳雖然新開但已經做得唔錯，每位食客都會送一碗增強免疫和強肺的湯水，65歲以上嘅長者更會奉送一支，剩係呢個都抵讚。
坐下唯一的不安，就係餐廳食物選擇太多，Menu也太過雜亂，揀嘢食有少少難度。
前菜點了一客特色龍蝦湯，味道係有點鹹，不過都算係龍蝦湯的原裝味道，湯附上的不是粒粒嘅龍蝦肉，反而是蝦肉，呢度就帶點美中不足，記得IKEA 曾經推出嘅龍蝦湯價錢平好多，都有小龍蝦肉，當然，可能你覺得我吹毛求疵。
但你繼續睇我篇文，你就會明白，點解我會覺得佢應該要有小龍蝦肉都好。
洋蔥湯就十分足料，呢個堅可以飲到飽，而且調味做得好好，你知不是很多餐廳可以做得好，呢度算收貨。
熔岩芝士焗厚猪扒飯絕對係一個大gimmick，以熱溶芝士倒落個豬扒飯到，可惜，要影相呃like或者影video就有難度，店員好快就將過程完成，因為驚芝士凍咗就好難流落去，不過，味道認真不錯，炒飯底加上茄汁，豬扒堅厚，大塊過面，令我想到銅鑼灣嗰間厚切豬扒飯。
外表精緻的原蕃茄濃湯安格斯肥牛肉湯烏冬 ，將烏冬放咗落去原隻嘅蕃茄內，完全吸收到蕃茄嘅精華，烏冬尚可，肥牛也是正常的水準，當然冇楊屋道街市個間咁正啦，不過，吃完後一定要飲個蕃茄湯，好得。
日式照燒鰻魚飯有少少失望，因為我來的時候，本身期望一條鰻魚上嘅樣子，而且要最大嘅size，不過可能鰻魚無乜貨，menu上只有這款，無size選擇，鰻魚都幾好食，係燒汁相對普通了一點，但熱愛鰻魚嘅人無可能不愛。
火焰安格斯牛河絕對係藝高人膽大之作，店員灑上白蘭地，然後在你面前放火，剩係呢個都有誠意有gimmick，用上安格斯牛當然不會不好，條條河粉都幾煙韌，但係炒得比較散，粉也不多，如果份量多一點會更好。
最尾的流心紅豆西多士，幾完美的句號，$45份，相對同頭先龍蝦湯一樣，價錢就貴左一啲， 當主菜都是$60-$120的時候，呢兩個相對貴左。
西多士煎得金黃夠靚，可惜太飽，如果唔係太飽，食芝士西多士應該個感覺更正。
還是要向前看吧，沒有了雄記，還有其他餐廳，荃灣好吃的多的是啦，呢間絕對係抵食而又夠潮的選擇。
沒有留言:
發佈留言