前日2月29日，四年一度呢一日，各大餐廳都推出唔同優惠慶祝呢個同世界盃奧運等一樣要等四年先發生嘅日子。
當中最平嘅莫過於呢間新開嘅神燈海鮮酒家，一連七日$29有碟生焗珍寶蜆。
可惜嚟緊七日都不在香港，無緣試到呢個優惠。
如果你在網路上都見到呢個優惠，亦都有興趣試呢間餐廳，我會推介你食埋餐廳其他優質的選擇。
當然如果你只叫一碟生焗珍寶蜆都冇辦法。
還記得兩星期前吃過的乳豬和阿拉斯加蟹，絕對令人印象難忘。
可能因為之前呢鋪頭位喺某名店嘅關係，乳豬做得不失禮，豬皮脆到不得之了，乳豬幾肥美，下面嘅肉都唔輸蝕，交出亮麗成績。
店員選了一隻超大隻嘅阿拉斯加長腳蟹俾我地，我哋選擇咗兩食，第一式係花雕雞油蒸，第二食係蟹蓋甲羅燒。
首先，花雕雞油蒸放上枱你已經聞到強烈酒香，那股香係好令人期待，蟹腳蟹肉正就不在話下，只要隻蟹夠靚就得，但係呢度嘅花雕和油香比例濃度剛剛好，只不過不好的是無陳村粉係底，如果唔係，呢個分分鐘好食過大班樓。
不過，最正嘅係嗰啲花雕雞又除咗可以用來送飯之外，佢更加可以幫你將花雕雞油整個炒米粉，估唔到呢個黃雀在後更加好食，更加出色。
係你面前整嘅甲羅燒，主角有蟹肉，蟹膏，蟹籽，蛋，係你面前撈埋燒呀燒，呢個野又係送飯一流。
之後唔可以錯過嘅就係呢度嘅蝦多士，同香港大學同學會的那個有過之而無不及，脆身而不油，蝦好鮮甜，加一口甲羅燒，另一更重口味食法。
脆皮小棠菜呢啲懷舊菜式呢度都有提供，做得不錯，蝦膠質感豐富，而且外層香脆可口。
用上美國桶蠔的生焗桶蠔，相對頭先幾個太出色的菜式，變得冇乜特別，但係如果講食材質素依然不錯。
食咗咁多海鮮，叫番啲菜類食品，選了兩個試水準，雲耳百合鮮淮山和梅菜蒸菜心，兩個都正常水平，特別菜心勁嫩綠，梅菜蒸得絲絲入扣，淮山就正常，但選菜的多元化如吃雜菜一樣。
以近來吃過的中菜來說這間都算突出，而且價錢大眾化，油尖旺區來說絕對不是太離地。呢個燈神又點會滿足唔到你食好嘢嘅願望呢?
沒有留言:
發佈留言