前日係國際壽司日,大家有冇食番件壽司慶祝下?
講開食壽司,就好想同大家分享一間近來非常驚喜的日本餐廳,不過同平時食開壽司和廚師發辦嘅你去開嘅區域,完全不同。
唔係中環、尖沙咀或者銅鑼灣呢一類日本菜核心地,亦都唔係另一個壽司競技場元朗國,ladies & gentlemen 今日我帶你嚟到石門。
你會奇怪石門竟然有壽司食?無錯,位處於石門嘅帝逸酒店,呢度嘅頂樓有一間有日本廚師主理嘅餐廳,佢叫源峰。
可能你會奇怪,點解要入到嚟石門食日本菜?
對啊本身我都冇特別大期待,因為本身冇做功課,只係想參觀下呢間新酒店同食餐廚師發辦,但有時人生就係充滿驚喜,轉角就遇上最驚喜的事情,美麗的意外。
首先餐廳嘅環境真係非常之清幽,望住河景,而且高聳入雲,同石門令一間M字酒店品牌嘅靚景餐廳,有過之而無不及。
開頭我也會覺得有點遠,但食完後,絕對有再訪嘅衝動。
今晚主要來試嘅係廚師發辦,朋友教落食Omakase 通常先吃中價感受水準,呢度價值$1280的菜單為中間價,另有$1680的套餐,我食呢款有前菜、生蠔、三款刺身、十二件壽司,細卷、味噌湯和甜品。
老實講定價一啲都唔進取,以咁好嘅酒店餐廳環境,呢個價算係抵食。
前菜已經夠特別,用上德島珊瑚樹蕃茄,下層添上帶酸味的啫喱,完全係為你嘅食慾加上強勁turbo。
之後就嚟三款刺身,廚師準備嘅時候,見到都肚餓。
赤身和中拖,鮑魚切片,擺盤精美,兩款都好好食,平時由淡味開始,但今天三款是相對比較濃味。
鰹魚刺身經調校後,味道香濃,整個味道層次更加豐富。
尾聲嘅日本蠔係常見嘅真蠔,肥美肉厚,大隻得驚人,一啖吃下,要慢慢享受蠔嘅鮮味。
由於唔係坐壽司吧枱,壽司一碟過上左兩round。
第一round有魷魚、赤貝、深海池魚、池魚、牡丹蝦。
魷魚最特別,刀工切到勁碎,加上調味,新鮮感一流。
赤貝相對簡單,雖不深刻,但也好吃。
深海池魚和池魚各有千秋,愛重口味嘅我當然喜歡前者。
牡丹蝦加上蝦膏,我想唔需要點樣推薦吧。
第二round 係重口味之作,醬油漬吞拿魚,拖羅和鰻魚。
三個都好有力,為當晚味道嘅高潮揭開序幕。
可能你會話拖羅只係序幕?有冇搞錯。
冇錯,醬油漬吞拿魚,拖羅和鰻魚,三件都係正常水準,但當然都係令你們滿口油份和滿足感,但跟住落嚟嗰兩件先係經典。
師傅攞住火槍,加上一大堆和牛,已經知道重頭戲來臨。
係你面前輕輕一燒和牛,加上北海道海膽,我諗你就咁睇相都已經知道有幾好食,下刪3000字。
呢件壽司,當然係全晚最驚艷。
第二件又係驚喜,係小型嘅魚籽海膽丼飯,用上原隻海膽加上大大粒新鮮魚籽,輕巧身型,令人吃完依依不捨,當然頭先和牛海膽壽司太搶鏡,如果次序掉轉一下,整體感覺可能更好。
尾聲嘅味噌湯和豆腐奶凍也不用寫太多了,淨係頭先嘅陣容已經足夠叫你滿意。
當晚,除了要食廚師發板以外,還試了不少來自橫濱富主廚阿部雄一嘅手勢,G小姐特別推薦爐端蒲燒鰻魚。
上呢個菜式時,好有神秘感。一開蓋原來就係呢個爐端蒲燒鰻魚,好少爐端燒會咁有神秘感,而且漂出嚟係陣陣非常之強烈嘅煙燻香氣。
一啖吃下去嘅鰻魚,那種質感,令我想起柳川嘅鰻魚,肥美而迷人,好吃到一個點,完全沒有絲毫嘅腥味,只有肉質嘅甜美,滿口都係強烈鰻魚,燒汁和爐端燒嘅技巧同藝術。
以鹿兒島鰻魚即場燒,魚身夠肥美,而且大部份邊位都很脆,就算你不吃廚師發辦,我都建議你一定要食呢個。
中間有另一個推介係而家時令之選,係好少見嘅公魚。好自然見到呢啲擺盤同味道,就好似去咗大阪一樣。
公魚嘅鹹香味好特別,加點青檸,更重鮮味,而且仲有點點魚嘅內臟,可以俾你送酒,相信很少日本餐廳有呢一道作品。
試完佢嘅公魚後,還吃了這𥚃的燒物,當然要是最好的選擇,店方推薦的鹿兒島西冷牛同群馬縣上州牛柳,不二之選,兩種嘅牛味都非常濃郁,而且口味夠為重,貫徹九州嘅爐端燒風格。
再來尾聲的燒雞翼,也非常不錯,足以印證呢度除咗廚師發辦做得好之外,基本上來食一餐剩爐端燒都值得。
前晚剛巧又來這酒店食飯嘅時候,和M小姐講開,我才讚不絕口,滔滔不絕可以寫篇長文,然後睇返呢篇文,都真係幾長,冇辦法,美麗嘅意外係要寫多啲。
沒有留言:
發佈留言