朋友C小姐一路都係太子一間串燒店嘅忠粉,前幾日佢又喺嗰度搞局,不過剛剛八個人,無緣出席。
嗰晚咁岩都係喺太子,串燒癮起,不如我自己試吓搵間嚟食下,之後我就搵到呢間串串燒。
戴頭盔先,首先我要講呢間唔會係超級勁好食嘅選擇,不過以價錢來講真係超值,你唔好話睇完介紹去食發現佢冇Yardbird咁好食,兩個層次,兩個價錢。
淨係以性價比來講,我覺得來一次,無所謂,呢度開到凌晨兩點,食餐宵夜,飲杯嘢happy hour非常之適合。
第一個優惠,又有前菜,又有五串串燒,又有1.5L勁大杯飲品,都只係$100。
第二優惠,呢度任飲plan,好平,睇menu都知,不過今晚無飲,因主力醫肚。
第三個優惠,係蠔,只要你叫紅白酒,一支最多百幾,來自美國中碼嘅生蠔,五十蚊六隻,個晚見人食,又係好大隻的份量,見隔離枱,兩人食左兩打。
可惜,今晚主要試水準,輕吃一下,不過都感覺不錯。
個別野要讚嘅首推呢個孜然蒜蓉茄子,非常好吃,如你係蒜嘅愛好者,一定大愛,燒得剛好,調味夠勁,係愛重口味之人的首選。
燒羊架和牛柳也不錯,價錢可接受,羊架味道不羶。
燒芝士翠肉瓜,厚厚的芝士,你係芝士迷不會錯過。
燒枝豆,燒秋葵和汁燒大蔥豬頸肉,也是送酒良品。
燒多春魚,燒冬菇,無乜特別,尚可。
雞泡魚乾,送酒一流,可惜今晚無酒飲。
燒韮菜同孜然蒜蓉茄子一樣,又係愛呢類菜式的朋友愛的口味。
蜂蜜魚腐燒,聽個名完全唔似好食,但係食落同雞泡魚乾一樣嘅感覺,幾好。
最後點的惹味燒雞脾肉,夠強夠重,轟炸你的味蕾。
跟住頭先我哋叫個餐每人一杯1.5L嘅飲品,飲足一晚,見到你杯野你諗係邊度,我想到朱敏記嘅謝安琪。
食咁多,一位都不用二百,你話係唔係價廉物美先?
當然又係嗰句以講食港式串燒嘅睇法,請你唔好同我講Yardbird,記住你係九龍,呢度喺旺角彌敦道。
串串燒
旺角彌敦道733號振宜大廈地庫
沒有留言:
發佈留言