還記得愛上越南嘅大頭蝦，應該係喺胡志明市，幾年前，當時吃一隻大頭蝦，大概港幣$80，嗰啲膏多到可以飲，好似手掌咁大嘅大頭蝦同食龍蝦肉冇異，就在那個時候就愛上了越南大頭蝦。
喺香港有時食自助餐，都會遇上呢類大頭蝦，不過始終味道都冇咁好食，莫非真係要到越南先至可以食返嗰種應有嘅鮮味？
龍苑中菜廳有個大頭蝦嘅Menu，有多款大頭蝦嘅菜式可以選擇，吃完後我們一班朋友還相約一定要喺越南再聚，同樣試多次大頭蝦嘅鮮味。
當晚做緊唔同嘅優惠，又酒店七折coupon 又有醫護人員優惠，龍苑基本上滿座。
幸好我哋都留咗枱，不過好熱鬧，感覺同社會以前歌舞升平嘅時候一樣咁正，唔通個個都為大頭蝦以來？
避風塘大虎蝦，呢個先拔頭籌，用上港式風味調教來自越南嘅大虎蝦，到底會係咩樣？避風塘炒過之後感受完全唔同，熱辣辣嘅鑊氣加上蒜茸、蔥，辣椒嘅香氣，絕對係港仔最愛。
蒜蓉牛油焗大蝦，其實手法度度差唔多，只不過用上勁蒜蓉同牛油來焗，相對越南餐廳好多地方都會有呢個方法來造，但牛油香，絕對叫你迷倒。
愛咖哩人必選咖喱大虎蝦粉絲煲，如果你熱愛咖喱，然後又愛粉絲煲，就更加之鍾意，因為條條粉絲都吸收晒咖喱嘅精華，而咖喱汁又可以送飯，嗰隻大頭蝦就變咗好似配角一樣。
吃茄汁煎蝦碌時候就會諗起媽媽和婆婆，呢個好似屋企嘅菜式一樣，你一定會食得高興，而且就像平凡的家庭小炒，蝦碌完全吃得出大頭蝦嘅新鮮又爽口。
食咗四款唔同嘅大頭蝦，就知道同平時我哋食開嘅蝦真係好唔同，大件而且肉質好爽口，真係淡淡都彈牙，有機會嚟我建議你試晒咁多隻，因為每隻都有唔同嘅性格和特質，四隻都好出色。
當晚亦都試咗幾款龍苑出名嘅菜式，都可以分享下。
招牌紅酒燴牛尾煲食過都好幾次，呢個真係一流，牛尾入口即溶，而且個紅酒汁，配上小饅頭真係好正，我件牛尾大到一個點，女仔真係會食唔哂 ，不能錯過的必點菜式。
另外枝竹火腩紅炆龍躉翅煲都係首選，好似我老婆呢啲鍾意食魚又係讚不絕口，龍躉翅大條到不行，講真你喺外邊大排檔或者好似金山海鮮酒家呢類餐廳食都差唔多價錢，但係呢度用上一個同樣嘅價錢就食到酒店級嘅級數，講真，夫復何求。
另外食左金絲鵝肝百花炸釀北海道帶子，呢個高貴到不得了嘅菜式，我諗都唔使講點樣整，或者有幾好食，淨係兩樣名貴食材放在一起，你都可以諗到個化學作用。
最後再加上一個通菜煲，有魚有肉有菜，剛剛好圓滿。
尾聲就當然要同樣吃龍苑嘅好味甜品，一個叫豆花，一個叫蛋散，咁就不如兩樣都食晒。
呢個Menu做到六月底，大家有興趣食越南大頭蝦嘅不妨黎試吓，去不到越南，暫時過嚟食個飯就當去咗越南啦。
沒有留言:
發佈留言