灣仔冰室：心曠神怡的冰室

在灣仔約了朋友睇戲，睇戲的前後，當然要先吃個午飯，十二點幾，周圍都係人，食飯時間水洩不通是灣仔的餐廳標記。

經過一班KOL博客的上網攻勢和唱好，在灣仔華嫂冰室，人流更加是嚇人，就咁用肉眼睇條人龍，我相信排一個鐘都未必食得到。

用一個鐘來排茶餐廳，我依然不明白這是一個什麼的concept。

人生那有咁多時間排隊，就好似子孫一樣，是有quota的。

當然我唔會同佢癲，就在隔離的灣仔冰室，也是非常多人，也有不少好評，咁啱經過，當然進去吃個快飯先睇戲。

就算多人，也不用排咁耐，幾分鐘便好了。

先點第一樣是菠蘿豬扒包。

記得認識這間餐廳是因為這個包，大大件豬扒厚厚實實，加上蕃茄和生菜，焗得又鬆又脆的菠蘿包，甜中帶鹹，好味道。

可能你會認為佢係抄隔離華嫂，但我上網看過對於這間餐廳的菠蘿包，也有不少正評，事實也不錯。

女友一直想吃北角的黯然銷魂飯，未去到北角個間，女友叫了黑毛豬叉燒飯，黑毛豬叉燒非常大舊，肉質肥美，燒得垂涎，加點醬汁，送口飯，好配合。

雖然那個太陽蛋不是煎得十分好，但只是賣相問題，加條菜，感覺健康一點。

我點了熱奶茶，最基本的茶餐廳質素，熱滑茶味濃。

女友的奶茶紅豆冰，不是什麼特別的飲品，唔會好大期望，正正常常。

我的正餐乾炒牛河，炒得非常之鑊氣夠，每條河粉散落四周都是香氣，條條粗壯得來彈牙有咬口，牛肉也不會太韌，只是可能有人會覺得有一點油吧。

半個小時便吃完的快餐，行出去華嫂人潮依舊。

令人心曠神怡的，是冰室的快捷好味簡潔。這樣排隊又是否違背了茶餐廳或者冰室的原意呢？

我好想問下排華嫂的人。

灣仔冰室 

灣仔謝斐道250-274號地下9-10號舗