聽媽媽的話

人們都說，媽媽都是非常麻煩的人，因為她們就是可以煩到你傻，每樣野Loop Loop Loop，而且媽媽通都吹毛求疵，奄尖腥悶，重申我好怕帶佢食飯，吃得不好，銀包受罪之餘耳朵也會受罪。

每當佢放假叫我約地方食飯的時候，往往仲頭痛過約女仔去食飯，又要好食，又要好坐，又要平，又要啱好味，又要搭車方便，基本上能人所不能，如果你要聽媽媽的話，你應該會學到好多野，至少耐性，一定是你意想不到的收穫。

當佢話食日本野的時候，上網做下功課，唔去放題又唔貴又好坐，地方唔多，當見到上網有人食蠔軍艦，我想起一間我吃過一次的餐廳，然後我想似乎我找到了。

上次吃過的雷霆救兵式日本菜經驗，稚內這間日本料理大部分都對辦的食物，我就試試聽媽媽的話，會不會可以吃到餐安樂茶飯。

六點就去到等開門，全因星期日晚上，早食完可以早番屋企，特別係今朝五十九年前所未有得三度咁凍的日子的時候，我想早食完早回家，於是我們六點就到了。

極上刺身盛有七種，剛剛夠我們三母子食，三文魚，甜蝦，帶子，油甘魚，𩶘魚，鱆紅魚，北寄貝，每樣都非常新鮮，最重要係佢個價錢咁平，當中帶子和油甘魚特別新鮮，而我成日叫媽媽要吃多一點的北寄貝，有助骨質疏鬆，要孝順媽媽，記得叫佢食多啲。

上次吃過最好吃而又叫我著迷的就是這個廣島蠔軍艦，沒有退步，依多是像軍艦裝著海水般，廣島蠔的那個鮮甜和肥美，你絕對好難有機會係外面食到，記得，黎到呢度，你一定一定要食廣島蠔軍艦。

蟹膏軍艦也是上次必食的推薦，今次都做得不錯，不過，上次吃的時候蟹膏好像較為泛濫一點，啲蟹膏多到有反艦之地步，大概喉嚨會有被淹死的危機，今次可能媽媽來到，店方見老人家都保守左，雖然蟹膏冇咁多，但依舊是非常香又濃，媽媽也愛吃這個多過廣島蠔軍艦。

鴨脾蕎麥麵，這個絕對有誠意的菜式，聽店員講方法復雜，鴨脾以油浸六小時，再慢煮左十六小時，天啊，竟然日式小店都有慢煮菜，而且鴨脾是絕對的迷人，可惜是蕎麥麵有點格格不入，我個人覺得烏冬會合口味一點。

芝士什菜焗釀大菇，金菇，菠菜，芝士在這個大菇裡，周圍包著菠菜，大大隻的菇外面煎得乾，但裡面好濕潤，芝士又焗得色香味俱全，愛菜者不能錯過。

我們都是愛菜的人士，當然要多一點，蟹粉炒什菜，蟹粉滿佈什菜中，最喜歡當中有翠玉瓜，而蟹粉和大部分的菜也非常夾，媽媽除左刺身外，全晚最喜歡就是這個菜。

弟弟卻是食肉獸，他自己點了孜然羊肉，你聽個名會以為係一串串的沾上孜然粉的街邊串燒，點知外形完全唔同左。以韮茜，蔥，蛋汁，孜然粉和羊肉做成的條狀孜然羊肉，令我想起伊朗吃過的羊肉條，不過幸好這裡的不是太過羶，就算我怕羶味的也可食到，羊肉包著的是大量的韮茜和蔥，味道平易近人。如果你喜歡嘗到孜然味就未必適合，因為佢孜然粉全部係裡面揮發，和平時串燒處理手法不同，喜歡不喜歡完全隨你口味，但事實個羊做得不錯就是的。

食完後，如行刑望著媽媽的樣子，幸好，她都幾滿意是日安排，幸好，聽媽媽的話，今晚可以吃一餐沒有怨言的晚飯。

只不過，我真係好唔明，點解蟹膏軍艦會好食過廣島蠔，有時，媽媽的話真係另人摸不著邊際的....

PS另外一提，呢度個茶好特別，勁好喝，係綠茶溝玄米茶，下次來到記得試試，如我般愛茶的人一定鐘意。

稚內日式創作料理居酒屋

太子通菜街210號地下