每年我都非常期待可以像台灣人般排隊等下買夜市的食物, 去年在朗豪坊的街道,二百幾蚊食到非常開心。
今年,非常期待下,諗住初一晚去大吃一番。
點知十點幾已經有消息話有警察同本土民主前線團體對峙, 我同幾個朋友為左食,唔怕危險都去探個究竟。
大概,我們沒有想過,初一會以流血收場, 我尋晚去完還以為只是普通對峙,點知又開槍又胡椒噴霧又磚頭, 仲要玩到朝早。
唉,我們都是為食的一份子,想食野點解要人人都受傷呢?畢竟, 這是普天同慶的日子。
幸好,執筆的這一刻聽新聞話旺角仲有都幾開心, 大家襯機會再去食啦。
一齊回顧下尋晚魚蛋革命時見到啲野食,然後今晚把握機會去食啦。
街邊檔又點少得經典的炸魚蛋呢?一年好難先見一次, 雖然呢檔不是最好的味道,但還是要感受一下這個真本土美味。
臭豆腐係核心成員,點少得佢呢?不過呢檔唔算太臭, 這裡也當然沒有太子那檔之好,但想食起碼有呢個選擇。
從前舊戲院門口的燒魷魚又點少得。
還有去年已經有的燒蠔,今年繼續有,而且還大排長龍。
秘製醬汁燒魷魚,一份三十蚊,都幾平幾好食。
炸大腸,呢檔真係好食,大腸唔係好肥,炸到金黃色, 睇到都流口水,加上甜辣醬,任你調味。
還有串燒檔,有用傳統炭燒,有就咁煎串燒,你喜歡乜形式都得。
我們選了用鐵板煎的,牛丸墨魚丸也不錯, 大大條腸又係掃街最有霸氣食物之一。
當然,還有那個牛肉,好得。
朋友吃炭爐的串燒,別有一番風味。
連高級點的芝士蒜蓉包同蘑菇湯也有,咁中產, 連曾司長都可以落黎幫襯。
朱古力士多啤梨美味棒和麻醬烏冬,少見的選擇,看你喜歡與否。
還有搶購一空的炸餃子,咁好賣應該幾好食,可惜我冇緣份。
看見一架車,佢叫酒鬼啤,還hastag#一起酒鬼, 甘蔗黑貢梨金桂圓紅,你要飲乜就選乜,可惜揸左車,無機會飲到。
最後,當然要支持一定有的深水埗新記腸粉大皇,牛肉腸是依的滑, 人龍是依舊的長,記得想食就快排。
用左呢個平台,當然要講少少呢度嘅出品, 以腸粉滑到不行的新記腸粉大皇,叉燒牛肉鮮蝦任你選擇, 當然三種我都食過,今晚吃的是牛肉腸,佢嘅滑絕對係外間少見, 熱辣辣之餘,白雪雪的腸粉透視是剛剛如初生之犢的牛肉, 加上那個秘製的豉油,無得彈。
似乎每次有夜市就會有呢個新記腸粉大皇,相信過左今晚, 佢同魚蛋革命絕對有密不可分的關係。
我見到的大致係咁多,不過今晚初二就電視所見冇打架, 見到有魚蛋燒賣等檔口,大家想食就快點找緊機會啦。
我們的初一有魚蛋革命(Fishball revolution),希望一晚就夠了, 希望唔好再有流血事件,大家開心食下野排下隊就算啦,祝福香港。
沒有留言:
發佈留言