認識這個地方源於去年的一餐生日飯，那次的經驗非常精彩，還深刻記得一點一滴，之後，有問過我私房菜嘅推介朋友都記得我曾介紹呢間野。
不過上次太懶，冇的起心肝去寫返一篇文。
一年後再訪，感覺完全不同，同上次嘅經驗好大分別，而且主題更特別，適逢在家抗疫時間多左，於是更有心機寫番篇文，介紹下呢個地方。
係詩房菜負責人SaSa Facebook friend一段時間，看到剛剛她去左摩洛哥旅行，這一直是我wishlist 內的國家，可能是因為Casablanca 的關係？我估這電影影響我沒這樣的深，睇過好多愛攝影嘅人係摩洛哥影過嘅相之後，你都會愛上呢一個咁靚嘅地方，自然就成為wishlist 。
大概愛旅行, 愛攝影的都會自然對呢個私房菜提起興趣。
一直以來Sasa係一個愛攝影嘅人，當然佢另一個強項係烹飪，當你看到佢摩洛哥嘅相之後，大概你想不到佢會話你知，去完摩洛哥嘅佢嘅私房菜有摩洛哥菜提供。
我想香港嘅摩洛哥菜餐廳一隻手都數得晒，異國風情，從來都唔容易為人接受。
一係你去過嗰個地方，一係你對個地方好有興趣，又或個地方嘅菜式出名好食，你先會想試。
我係後者，而且我同佢一樣，雖然我煮得唔叻，但我好鐘意食。
我總覺得要了解一個地方嘅文化，從食物著手係一個最好嘅方法。
就好似今日呢一餐私房菜試咗好多唔同嘅嘢，都令你感受到果種特色，你話好似去咗一晚摩洛哥咁，有冇咁誇張，我話你知，感覺不錯就是。
如果你要我講，好深刻嘅一定開場嘅前菜，十多款式可以任你選擇，好難每樣話俾你聽係乜嘢，但大部分都係好健康嘅蔬菜如茄子、薯仔、紅椒、黃椒、蛋、蕃茄，還有很少在香港見的茴香，基本上每一道都咁好，冇乜特別私心，要說最愛，一定係少見的茴香吧。
基調係運用不同香料，令每一道前菜都充滿異國的風情橄欖油、紅椒粉，我大愛的芫茜、洋蔥、檸檬，香葉等等，準備時間長而且有心機，其中有好多要前一晚準備，而係呢啲摩洛哥手法調味之後你會感受到每種食物不同的個性。
你以為調味好簡單，但我告訴你，你自己用返晒材料都未必做到呢個手法。
之後就進入主菜部份，主菜係檸檬雞。
上菜嘅碟都係喺摩洛哥帶返嚟，打開蓋，氣勢一流，無論香味或者樣都好正。
用上自家醃製的檸檬，唔會太酸口味重但係亦都唔會勁油膩，還有大量我愛嘅黃椒紅椒。
雞要配上couscous食埋個汁先正，以當地的煮食器皿，聽Sasa講佢特登喺摩洛哥帶返嚟，為嘅係要有煮到couscous質感，更加令人吃過不停。
個人較喜歡雞髀位置，而且雞肉好嫩，佢亦都話唔會用大陸的雞，質感可能和你平時吃開的有分別。
第二個主食係自家肉丸，用上兩成羊肉和八成牛肉來製成，就算怕羊味都唔會覺得過羶。
最重要成餐飯你會看到Sasa係當地搜集回來的器皿，然後你可以聽佢講返係摩洛哥一點一滴嘅有趣事，感覺像和朋友一齊食飯。
成晚我最深刻一定係薄荷茶，加上糖和薄荷葉，淨係睇佢沖已經係賞心樂事，這個茶係別處你一定飲到，但就是拿捏不到那個正宗摩洛哥風味。
再加上甜品也是精采得很，完全冇用麵粉把煮熟嘅橙加上雞蛋、肉桂和糖來完成，不會太甜而又好吃，箇中質感同一般嘅蛋糕都與別不同。
一口薄荷茶，一口香橙蛋糕，最完美的結局。
連薄荷茶都可以揀杯，幾有氣勢。
如果你愛烹飪，而且又是完美主義的朋友，你來到，一定無錯。最重要，愛吃來，更加對。
看她做嘅私房菜非常多元化，我上次來吃過的西餐當然好，佢係佢個page見到有好多唔同類型嘅菜式可以揀，又如今晚我喺度吃的摩洛哥菜，還有之前看過有只有鏞記有的射雕宴，又有齋菜，中菜等等，你訂嘅時候，同Sasa講就得。
整晚都是$700一位人頭，但份量多得很，前菜基本上食唔晒，攞走可以食兩日。
又或者如果你想過一晚摩洛哥之夜，安慰下你冇得飛嘅心靈，PM我，幫你安排。
沒有留言:
發佈留言