雖然我冇咁變態,但對呢一個草帽蒸氣火鍋實在又愛又恨, 而且上次挑機唔成功,劉小姐知客入左我一粒,因此我決定覆桌,( 詳見食評:給最有霸氣的知客)為左要食到呢度嘅火鍋,就算食唔到海鮮, 我學那些山海經的神人咁吸風飲露般決定蒸氣都要食下, 我再打電話訂位,由於我唔夠膽再遲到,我試約七點半, 等自己唔會再被全港第一知客奚落,要活出真我的風采, 今次我要做番個有霸氣的食客。
當天,我以為工作十分順利,誰知七點三係佐敦渡船街附近放工, 遲與早只差一線,我當然想乘的士去, 這樣我先可以有霸氣咁攞位食飯,但係星期四的晚上, 七點多搭的士應該難過中六合彩,那刻都有想過call Uber,但係香港政府唔知幾時會連乘客都拉埋,食唔到草帽, 見唔到知客阿姐,仲要保釋好不化算,眼見時間過去, 於是今次我醒,我決定打電話去。
我:阿姐,我訂左七點半。不過我可能要遲少少。
姐:霞,遲到,你不如錢小少啦,而家禾地好爆
我唔知點解突然改左名叫阿霞,那刻,我真係有點不知所措。
我:阿姐,我都知,唔爆我唔訂位啦,我上星期已經訂左遲冇位入, 如果你地唔得點解要俾人有訂位呢個選擇呢。
姐:哎呀,唔好意思,咁啦,你晏啲過黎啦。
我:咁即係幾點呢。
姐:不如九點鯪啦,禾地少啲淫。
我:得啦,唔食啦。
我心諗,你咁多淫,我點識食。
我那刻收線後的憤怒,如果有個知客係我面前, 我諗我應該用粗口數你,不過,收缐憤怒過後,隨之以來就係冷靜, 你叫我九點黎,好,唔怕,我本身諗住食完飯去睇戲,好, 而家我睇完戲先食飯,於是,我自以為好型咁打去多一次。
我:阿姐,得啦,而家唔駛你地辛苦,我十點後先黎, 應該冇問題啦。
姐:唉,好呀,真係胡該哂妮呀。
那刻,我想係唔係因為我那篇文章而換了劉小姐,我有點奇怪, 還是佢好似上次咁好戲,連聲音都可以演戲,我不知所措, 又唔記得問佢姓乜,於是,唔理啦, 呢間蒸氣火鍋已經令我失去常識理智,那天晚上, 我在旺角moko看完破風,十點半,來到了潮福蒸氣火鍋。
I phone 播著的是張學友的再度重遇你,我的心情非常忐忑不安,肚又餓, 為左佢我連爆谷都唔食,唔知有冇其他食家講到咁好食呢。
我以為我和佢會再遇見,差點要唱蘇打綠的時候, 我來到了潮福的門口,竟然,她不見了,那刻, 我的心情突然有點落幕。
我有想過如果見到佢會唔會同佢開波,但為左唔想係you tube出現,我還是訓練微笑,但來到才發覺劉小姐唔係度, 難到我篇文出左之後,所有公關公司立即高薪搶人, 還是酒店睇中佢技巧與霸氣?那刻我想,如果九記要知客, 佢絕對勝任,入型入格,無人能及。
不過,算啦,唔好再講佢,而家有得食,乜野不快也放開了, 就如青峰說: 一念之間,想對你傷害我的一切,說聲謝謝, 唔係你個日唔俾位我同咁串,搞到我嬲,我唔會咁快想再過黎, 完全因你,我終於可以開懷吃呢個我等左好耐嘅蒸氣火鍋了。
對比另外一間紅磡的蒸氣火鍋,這裡價錢其實大眾化一點, 地方舒適一點,而且海鮮都係一樣放係外邊俾你任選, 兩間都係人氣店要等位,不過呢度始終係集團經營, 就好似茶餐廳和大家樂的分別,同樣焗豬扒飯,同樣是蒸蚌仔, 集團多了一份一致與routine。
這裡多了的還是一份混醬,這和紅磡的蒸氣店不同, 而且海鮮大部分都有調味,呢點有好有唔好, 因為其實沒有調味真係係屋企都食到,呢度海鮮好處就係多元化, 一種海鮮都有兩種以上的調味讓你選擇。
呢個帽子蒸籠的確係好搶眼,不過都幾重, 在蒸氣發放的時候就像一間小草屋。
每樣食物都好像外面的蒸氣火鍋,會教你蒸幾耐幾長,非常細心, 務求你吃到海鮮的最佳狀態。
不過,可惜太夜過黎,本身想食的元貝和蟶子都已經無貨, 當刻即刻冇哂mood。
於是,叫了支青島降火,然後再開始選食物。
霸氣一點,一開始就食個蒜茸蒸開邊龍蝦$98, 雖然不是很大份很大隻,用的也只是養殖種的波士頓龍蝦。 蒜茸滿佈了龍蝦上,香氣撲鼻,蒸完五分鐘後,賣相更佳, 蝦肉的確爽口,蒜香令龍蝦更突出,鮮味無限。
最愛的元貝和蟶子也沒有了,唯有食象拔蚌仔, 但呢個係非常大的驚喜,蒜茸粉絲蒸的傳統做法絕對係隱陣而精彩, $78一隻雖然有點貴,但其 4分鐘的過程,粉絲和食象拔蚌仔的texture, 是美味動人的故事,可惜沒有元貝和蟶子,我相信以他們的手法, 吃元貝和蟶子一定會更加精彩。
海中蝦五分鐘就蒸好,每隻雖然唔係巨型得很,但豐滿有致, 蝦頭都有蝦膏,廿八蚊両,實在抵食,不過冇乜調味, 簡單就是鮮味的海鮮美。
叫左咁多大路食物,叫啲特別重口味,新鮮大魚頭, 應該很少地方可以食到,八分鐘蒸熟後,靠實氣勢如虹, 喜歡慢慢用舌頭舔骨的朋友愛不釋手,而我就普普通通, 不過在調味後,魚頭也不見得腥,魚肉幼細而嫩滑, 愛魚的不要錯過。
除了海鮮,當然要食下肉類,蟲草花蒸新鮮雞,$ 148半隻的價錢也算可以, 喜歡蟲草的花香把雞都沾上了一點香氣,雞件滑嫰, 我很喜歡就這樣食那些蟲草花,最重要係雞件是新鮮到不行的貨色, 我覺得好味到可以送飯。
簡單的清蒸菜遠為結尾,好多人會以為一定食粥啦, 由於今次得兩個人,海鮮不多的情況下,我覺得叫粥係浪費左, 所以我決定今日剩係食海鮮和一點的魚和雞,小試牛刀, 吃了點菜後,我選擇了結單,揮揮衣袖,不帶走一點雲彩和蒸氣, 帶著滿足飽暖的感覺離開,和朋友便擇日再戰,下次先食粥。
下次我想我會試到另一分店吃了,因為劉小姐的技巧,念念不忘, 你是如此的難以忘記,希望大家睇完上篇文章後也會看上你的技巧, 將你的知客大全教導其他人,最重要,我真心覺得九記好啱佢做, 有心人睇到又識佢,俾啲意見,這匹駿馬,就是欠了伯樂, 潮福簡直埋沒了你,你是最好的,你知道嗎?九記等你, 九記需要你。
PS同朋友講開呢間餐廳都大讚他們的食物, 不過他們好像沒有遇上我的問題,原來尖沙咀,西環店都已經開張, 朋友就是去尖沙咀,還不用怎樣等位,下次重賽地點就約定啦, 羅生門juno話“別瘋狂,下個一月願如期團聚於冰島某地方" 咁我地就如期團聚於西環某地方吧,下月再見。
潮福蒸氣石鍋
旺角旺角道1號壹號商業中心1樓全層
沒有留言:
發佈留言