你搣啦

富臨下午茶，我可以話由細飲到大，大概經驗值冇十年也有五年。

最喜歡的是其燒鵝瀨同蝦餃同燒茄子。

喜歡的原因，好簡單，大件夾抵食。

寫左幾年都冇特別諗寫這裡，不過今天，發生了點有趣的事，繼潮福後又見到了些有趣的姐姐，我決定記下一點。

平常吃的燒鵝瀨，也算對辦，12.8一碗，由於本身冇想過寫，冇影相，不過要說的有時有脾供應，值得食，雖然你明知其實佢啲質素不是最好....起碼你知道自己唔係一樂和天鴻。

當來到我第二最愛時，操，我以為自己去左李克勤同容祖兒的演唱會，唱的是世界真細小，舊茄子平時係大舊一倍，今日食嘅係平日份量一半，連豉油都少左，唔通生意真係咁難做，其實我知九蚊一碟冇乜可以要求，但如果真係細份咁都，那刻我心情真係好似在街上見到前度的心情那麼無奈，世界真的那麼小，小得可憐到容不下吃大舊一點的茄子嗎。

幸好，質素還可以保持，那個魚肉雖然細舊左，但配合茄子還是簡單而好吃。

對面搭枱的阿姐搭訕，話:"係啦，冇生意就派傳單，好生意你就食少啲。"

我無言，香港人似乎好唔開心，一碟茄子也可引來不絕於耳的巨浪，說的都是社會的不快，香港越來越難住，你看到那個鑽嶺嗎?劏到得番二百呎都要搶購，仲要五蚊管理費。茄子都要被劏，香港，還有明日嗎?

叉燒腸，全日最正常的一員，無論外形，價錢同味道。

每次我也會來叫個菜，時菜腐竹，三十蚊食個全菜，的確幾貴，不過喜歡其清清的白菜仔，還有孤寒到不行的腐竹，唔講我以為係好似山珍海味之貴價物。

最後，食到我最愛的蝦餃，真係搞笑到不行。

一放低，傳菜阿姐已經好不情願咁。

佢係一籠籠點心好辛苦咁搵到蝦餃，放低俾我。

加一句，阿姐話：你自己搣啦(好唔客氣地說)

我心諗:搣乜春。

然後，我看看蝦餃，原來有點心紙黏在蝦餃皮上。

佢揮一揮衣袖，好靈巧地拿起其他點心就走。

剩下的是我和那蝦餃，我明白，我要搣左個張紙，當然，最後一搣連蝦餃層皮都搣左去。

蝦餃也是細粒左，不過精華所在當然係薄到不行的那層蝦餃皮，也許是我錯，搣乜春都唔夠叻，所以唔可以享用到呢個蝦餃嘅全部。

也許香港人生活真的很艱難，連食個蝦餃都要有技巧，仲要睇阿姐面色。

你搣啦，這句話以後我食蝦餃都會記得。

富臨酒家 Foo Lum Restaurant

長沙灣長沙灣道681號貿易廣場地下及一樓2號舖