老了,人就要接受新陳代謝慢的事實。
今天星期日,和弟弟兩個吃晚飯, 我借佢開學的藉口同佢食個開sem飯,自己老左,有弟弟接棒, 可以有後緩吃多一點,當然找一些好地方來吃飯。
身邊所有人都試吃過呢間火鍋,好難找到人再來陪吃, 上次和她來吃,不歡而散收場,但上次記得的是味道不錯,可惜, 回憶的味覺還是停留在那個感情轉淡的冬季,人去樓空, 前進也是必要的。
於是,來到和弟弟慶祝佢完成中學,正式進入人生另一階段的生活。 接棒,有兩個意義,一個係大專接中學的意思, 另一個係就算我吃到飽叫到成枱都係都有細佬接棒,突然覺得, 不枉照顧左佢咁多年,現在十九出頭的細佬做後援, 係一件多麼幸福的事,至少食什麼都不怕,想叫就是了。
熱到死的夏天,未夠六點便來到,弟弟還在地鐵中, 工作了十年做野一定有交帶,星期日盡可能都唔會遲到,於是飲著竹 庶茅根等佢,解一解渴。
在等待的時間,員工細心講解介紹呢個嘉美雞, 當然吃過一次後當然知道其優勝之處, 反而佢介紹左一個新野的確令我提起左興趣,弟弟還未黎到, 已經決定左叫呢個韓式芝士辣雞煲。
可能係個哥哥sell得好,的確就咁聽已經覺得個煲好吸引, 而且每日限量發售,那麼有gimmick 我也不考慮那麼多。雞煲分三part ,有大大盤的雞煲為主,更附上一碟泡菜,一碟芝士, 仲有一大jar泡菜湯俾你拾下拾下,有氣勢之餘,更覺得超值。
雞煲裡有大量的洋蔥,蒜頭等調味料,不過主要以泡菜為主, 飲一口湯就如部隊鍋的鮮味,聞都覺得吸引, 那邊廂剛剛的侍應細心地幫我煮熱個芝士。我們當然先吃為快, 雞件新鮮嫩滑當然不在話下,其雞件把泡菜的精華全吸盡, 味道如部隊鍋中的餐肉般。雞件雖然得半隻,但每舊都大大件, 絕對不是一些雞煲店細細隻的雞肉,份量夠而質素又佳。 煲底更有年糕,韓式風味之極致,食完你以為自己做左都敏俊。
煮完的芝士係另一主角,如果你覺得太辣, 把雞沾上芝士係另一風味,冇咁辣之餘更提供軟綿綿的口感, 芝士又唔會一味過份肥膩,感覺適中,不過始終太肥, 弟弟有的是quota,全碟清貨無難度。
黑松露帶子餃 108,這裡的星級名物,我覺得如果你不喜愛這裡的食物, 都一定會喜愛吃這個,除非你討厭黑松露,飽滿的餃子包得漂亮, 大大粒包如那些賣小了一個尺碼的胸圍, 裡面餡料全都好像要爆出來一樣, 你以為去左睇那些38G的胸圍show,味道是滿滿的黑松露味, 沾在大大粒的帶子和墨魚滑上,完全冇豬肉的餡料是矜貴的味和美。
手打四寶丸 118,有墨魚丸,有鯪魚球丸,有牛肉丸,有蝦丸四種, 呢個係第一次係度打邊爐食飯都食過,四種丸我最喜歡的是墨魚丸, 簡單的爽口彈牙,弟弟喜歡蝦丸,佢喜歡啖啖蝦肉的充實感覺。
牛肉丸,牛肉味好夠,實實在在以牛肉打的一粒丸,口感豐富, 滿口都是肉香。鯪魚球丸相對較遜色, 雖然大大舊的鯪魚肉非常結實,但就沒有爽口的感覺, 不過足料絕對是不爭的事實。
牛肉粒也是必點之選,呢度雖然食雞煲,但係佢嘅牛肉都絕不失禮, 牛味濃郁,特別係帶有肥的位置滑嫩有口感, 最重要價錢一點都不貴,一大碟十幾粒都只是118, 大大大大推薦。
響鈴$68,係自家製的,豆味豐富有層次,剛剛炸出來,香氣滿地, 就咁食都可以,沒有外面的包裝貨或一些次等響鈴有萬年油的怪物, 不過,吃一舊已經好膩,然後五舊都有弟弟完全包辦, 接棒大概是這個意思,驚嚇為什麼可以咁食得,那個年代, 好像離我很遠了。
最後,當然清清地來個菜心苗 38,我吃菜反而可以尋回弟弟吃響鈴的節奏,棒又再交回給我, 菜心苗綠得漂亮,一看知是新鮮貨色,兩三下就清光, 消去飽到上喉嚨的感覺。
最後,結尾火鍋當然要來過烏冬,麵或者粉來完結美好的故事, 今晚以韓國為主,當然吃個韓國拉麵 25,麵條煙煙韌韌,和那泡菜汁就是傳說中的一對,成個感覺, 滿足到不行,沒有公仔麵,火鍋就好似欠了一點, 我想感覺就好像男人抗拒避孕套一樣,感覺係差點就係差點, 相信唔止男人,女人也是這樣想吧……唔好誤會, 我意思係火鍋冇公仔麵,那個避孕套,忘記了它啦。
說得太遠,弟弟的開sem飯應該是健康一點的, 起碼你的大專生活快樂,起碼你接棒快樂, 吃完滿足的一餐為你的將來加油和努力。
奇樂香辣雞煲 K Lok Spicy Chicken Hot Pot
尖沙咀山林道29-31號廣利樓地下4號舖
沒有留言:
發佈留言