由於工作係香港的關係,基本上一至五都冇可能可以食茶餐廳, 特別係舊式茶餐廳, 剩番幾間叫有少少名氣而又好味的大多在中上環,幸好, 之前幾間非常有名的茶餐廳,開始有銅鑼灣大展拳腳,向東面發展, 為了一大班茶餐廳的支持者帶來福音。
特別係係天樂里呢間新開的金記冰室分店,開了不夠個幾月, 朋友非常喜歡,於是找我係唱K前吃過快飯。
大家都知道金記係西環復活有一年多的時間, 今次再下一城係灣仔銅鑼灣鹹淡水交界開了呢一間分店, 特別令人討好。
裡面的色彩繽紛斑斕,像兒時的遊樂場, 有過去的又怎會忘記我們小時候玩過的西瓜波, 還有那些洗腳吐痰的鐵兜,仲有你行一步我想你退一步的康樂棋, 餐牌也是小時候我們小學生最喜歡玩的乒乓球拍, 看到這些更加感嘆, 記得來食嘢之前看過一個九十後的食家打的食評, 佢唔喜歡茶餐廳的黏笠笠感覺, 對於這裡的兒時小玩意只是覺得幾得意而沒有唏噓感覺,我在想, 原來我真係和九十後都有點代溝了。
來到茶餐廳,我最愛吃那些什麼茶餐特餐, 呢度就係叫金記1967套餐,兩個都想食,一個係以鮮豬潤為主, 當然襯通粉啦,一個以新鮮沙爹牛為主,呢個一定要公仔麵。
當然,豬潤十分新鮮,加上濃濃的湯頭, 傳來一陣陣的蔥和薑的味道,通粉完全把幾種的味夾雜在一起, 雖然沒有維記般的好吃,但我覺得對比那個也是豬潤出名的康年, 也絕對不錯。
沙爹牛肉絕對不是特閒之輩, 侍應阿叔話呢度係用上打邊爐那些肥牛的類型來做這個沙爹牛麵, 沙爹味濃烈,牛肉沒用過鬆粉, 是打真軍的硬橋硬馬的優質牛肉配上濃郁的沙爹,平常人人愛一丁, 今日看到別人吃福麵,隔離飯香,我都有樣學樣,配上福麵, 沙爹味是更另一種著迷。
火腿奄烈係茶餐廳拿手好戲,點會有問題,牛油多士剛剛好, 脆得可愛,加上一口奄烈,我可以吃一世的美味。
試下呢度嘅小菜,蒜蓉炒西蘭花,簡單的小炒, 絕對體驗到茶餐廳的可愛與奧妙,小小的廚房,煮出的是一片天地。
呢度有好多出名嘅飲品,今晚選了黑牛, 已經不太多地方有這類飲品了,有的話更加應該珍惜。
兩個男人還是吃得不夠,於是叫多個咖哩牛腩撈公仔麵, 咖哩味非常精彩,牛腩淋得黎非常入味,配合大江麵沾上咖哩, 令人胃口大開,對比剛才的湯麵更吸引。
最後,之前在西環吃過羅宋湯非常不得了, 見吃撈麵口乾乾就整多個羅宋湯結尾,味道依舊不錯, 但少了上次吃過的那種驚豔,今次變得不過不失。
離開餐廳那刻,想起那些餐廳的擺設佈置,又望出去這段天樂里, 好幾年已經好像變得不同了,是我們的社會行得太快, 還是我們的時代真係改朝換代呢?也許,係時代步伐加速的情況下, 珍惜現在所有還是最實際吧,茶餐廳, 我總害怕有天會成為集體回憶。
金記冰室 Kam Kee Cafe
灣仔天樂里6-18號恆安大廈地下D及E舖
沒有留言:
發佈留言