鬼同你OT

暑假，除了學生放假，其實，打工仔也有著數，起碼，返工快樂一點，放工輕鬆一點，至少，搭車嘅人少一大截。

特別係office重鎮中環，平日夜晚已經係寧靜無比，加上靜夏的暑假，這裡更加是平靜。

是日在中環工作完畢，七點多中環已經是出奇的唔多車唔多人，感覺好奇怪。

既然冇人，我估食肆應該都係靜到傻，經過置地，想起一碗雲呑麵，我就想在回家前吃過快飯。麥文麥奀三多黃枝記都在腦海浮現，近水樓臺先得月，我從來都相信就手就是最大方便，特別係懶到出汁嘅男人係愛情方便嘅想法。

於是我選擇了最近的黃枝記。

記得上次過黎勁多人，時間應該係夜晚九點幾，那個時候準備食飽去老蘭飲野，這裡如翠華般多人，當時我記得還是兩層，今次過黎竟然大變身，而家反而係地底，十年人事幾番身，香港真係寸金尺土，連這個澳門老品牌也要讓步 。

更加奇怪的係，我以為食飯時間應該會好多人，但唔知點解離奇地少人。我兩個人包了餐廳一半場，非常舒適，反而與我上次的記憶完全不同，上次的熱鬧與今次的寧靜，非常大的對比。

朋友都說，可能因為農曆七月關係，所有人都早走早著。

唔好理，一人整碗雲呑麵先。

細蓉係傳統的小巧玲瓏，湯底係如常的大地魚湯底。

麵條是有嚼勁，沒有太大的硯水味，湯頭鮮甜，麵條有點點的蛋香，最愛是這些傳統風味，三兩下手勢便把麵條吃完，這是傳統的麵條美，我常常說，最喜歡的還是廣東雲呑麵多過日本的拉麵。

雲呑不是沾仔記的朋友，反而是近麥氏家族的那些小巧形式，細細粒容易食，雲呑皮薄得透視了裡面的乾坤，裡面藏者的是大大粒的蝦肉，少裡的豬肉夾雜著，散尾漂亮，誰看到都無不心動，一口咬下去，感覺更美妙，不過，慢慢享受，得到的更多，兩個食法都有其好處壞處，隨你鍾意吧。

突然，我們坐下食飯的時候，有六條OL走左入黎，坐在我們附近，個個都苦口苦面，突然我想起電影《有客到》個幾隻女鬼，而且呢幾個女仔都冇乜笑容，苦口苦面。佢地完全點不作聲，一人又係食碗麵，奇奇怪怪。我朋友注視覺得好奇怪，佢話六條女黎食雲呑麵，仲要OL，會唔會見鬼。

我們在吹水間，叫了個雙拼豬手與炸鯪魚球。豬手炆得又軟又淋，豬皮平是多半是豬手的靈魂，不過這類的肉炆得更絲絲入扣，而且肉質軟綿綿，連無牙婆都可以食到。炸鯪魚球就坦白說普通左少少，如果以傳統麵舖黎講，呢個真係較為遜色，和豬手差幾個馬位。

突然，我更加懷念澳門，唔止係黃枝記，當然還有六記的蝦子撈和祥記的炸鯪魚球。

我們還在想炸鯪魚球為何和澳門總店差咁遠，個幾個OL好齊整咁就帶隊走，行步路都冇聲，好離奇。

配合那個少人的環境，我真係自己見鬼，真係滴汗。

為左安心，食多啲嘢定定驚。

從未試過在這裡吃小菜，在傳統雲呑麵吃小菜就如係麥當勞吃通心粉或飯一樣，都係有少少奇怪。不過，太肚餓的關係，我們最後都選了吃士多啤梨，酸酸甜甜的感覺滿佈係當中，咬下去沒有用上太多的鬆粉，而且酸甜味道得宜，送飯確實一流，可惜這裡沒有得吃飯，如果唔係我絕對可以吃到兩大碗飯。

食完飯，見鄰近七月十四，都係早啲走吧。

我個朋友係多嘴仔，佢真係以為自己見鬼，於是問阿叔有冇見到個幾條女，阿叔又理佢，仲同我地講原來個幾條女係那些I bank 到做嘅女，成日晚飯時間break 過黎醫肚，大概做到真係粗俗啲講，做到"西口西面"，絕不是葉朗程講到咁美好。

唔解釋，我同個friend 都真係好驚，以為見鬼，那刻未知的恐懼，以為睇緊鬼片，我想，如果夜晚番工見到佢地，真係以為鬼同你OT。

幸好，農曆七月快過，祝日日OT平安。

黃枝記麵家 Wong Chi Kee

中環士丹利街10-12號地庫