如果你喜歡海鮮,香港準有適合你的地方,無論平與貴, 高級與市井,所有地方應有盡有, 西貢屯門流浮山鯉魚門香港仔等等,你總會去過兩三間, 當中屯門三聖邨係最平最靚而又大件夾抵食之選。
每一兩年總會去一次,因為最喜歡呢幾間街市好公道, 價錢又唔係特別貴,同埋呢邊餐廳非常集合, 煮嘅計法絕對平過西貢等旅遊區, 難怪開始越來越多大陸人係呢度食,冇辦法, 呢度都算佢地半個主場,感嘆是, 原來一簽多行影響唔止係金舖藥房多, 連呢個海鮮樂園都佔被內地同胞攻撼, 君不見你係迪士尼玩space mountain 前後左右都係大陸人,我想呢個大西北海鮮樂園都會好似迪士尼, 幾年後遊客應該會越來越多。
通常黎三聖來來去去都係個幾間,之前看過殿堂K小姐的推薦, 寫得非常吸引,於是留意到呢間位置較入的泰海鮮, 特別係當中那度辣酒煮花螺,寫得精彩無比令我好想試下, 難得今晚剛巧去到三聖,就book泰海鮮吧。
大西北果然係多人到不行,八點幾黎到都高朋滿座, 應該質素有咁上下,令我更加期待。
前菜係麻油豬耳,朋友話呢碟係粗嘢,麻油味濃,豬耳爽口又入味, 吃到停不了口。
泰式辣肉生菜包,都算係前菜,不過大碟都不得了, 辣味強勁又正宗,肉碎自己就咁食都非常開胃,酸酸辣辣, 為今晚的海鮮餐打開序幕。
係出面你應該好少見到九節蝦,今晚吃到的白灼九節蝦, 完全不需用豉油調味,蝦肉勁爽口彈牙, 鮮甜度對比平時吃到的赤米更吸引, 老闆放下呢碟蝦時更過兩招俾我地, 這些紅腳的九節蝦正正係野生先有嘅特色,如果腳呈黃色, 蝦肉並沒有咁鮮甜,而且也沒有這樣爽口,不過記得, 真係唔好點豉油,完全破壞了其鮮嫩的海鮮味。
象拔蚌兩吃,當然包括刺身和堂灼,個人喜歡刺身, 那質感和味道都係較為精彩,沾上日本豉油和wasabi, 更加係鮮味無比,不過其他朋友就覺得堂灼好少少, 試左一舊感覺係另一番滋味, 輕灼兩秒後的象拔蚌的質感覺雖然更為煙韌,但係, 准我一生一愛你一個,我還是喜歡刺身的鮮。
忌廉白汁花甲(烏冬底),呢個係好少見的形式, 通常花甲都會月清蒸或者係用鹹而濃的調味來呈獻的, 呢個用上少見的忌廉白汁,花甲完全吸收了那濃烈的忌廉味, 而花甲底下有的是專吸醬汁嘅最佳拍檔,烏冬。 烏冬吸收了的不只有花甲的鮮,而且有忌廉白汁的助攻, 吃完一碗又一碗,花甲雖然不是勁大隻那種,但也是肉質肥大適中, 兩個配搭想像不了般勁恰當。
油鹽水瀨尿蝦,大概你也好少用呢個形式食賴尿蝦, 通常都係椒鹽上的瀨尿蝦都會失去了海鮮應有的鮮味, 而油鹽水就完全帶出那種海鮮最應有的味覺, 就如平時吃油鹽水煮蜆一樣,用上嘅瀨尿蝦不是班馬類型, 但都係大大隻的瀨尿蝦種,啖啖肉都帶有鹽水的鹹鮮,味道一流。
清蒸星斑,食海鮮又點可以唔食蒸魚,星斑不是非常大條的那種類, 始終還有好多野食,不過,這種大小的星斑卻是最好的選擇, 蒸得剛剛好的星斑肉質鮮嫩,滑滑的魚肉配上蒸魚豉油,送飯一流, 面珠的肉更加是如女人的肌膚般嫩滑。
龍躉炒球西蘭花,簡簡單單,大大舊的龍躉球非常美味, 乾爽冇油配上西蘭花,同樣係精彩的魚肉,與星斑各有千秋。
辣酒煮花螺,呢個係香港人最驕傲菜式, 辣酒可以就係非常出色而野性,如果有公仔麵配合的話, 那麼便是天堂, 我還很想念那時香港仔漁市場的那個辣酒花螺公仔麵, 今天的花螺用上中等的size,螺肉也算大而得體, 吸納了辣酒的勁,送上白酒啤酒都會配合。
豉油皇煎鮑魚,相對樣子較為遜色, 可能平時喜歡吃的都是椒鹽和陳皮蒸,呢度嘅豉油皇煮得都算入味, 將其較為麻甩的食法完全地注入鮑魚中,鮑魚煙韌度極佳, 口感和味道都唔錯。
豉椒炒蟶子皇 (煎米粉底),這個係最晚最愛,自己最喜歡就係蟶子, 而煎米粉更加是我favourite的煮法, 蟶子係豉椒炒的情況下非常入味,每條蟶子皇都非常有彈性, 每條都表現得完美,加上煎米粉前得十分香脆, 沾上豉椒個汁將簡單的米粉餅升華到另一個景象。
吃到呢度真係極度滿足,可惜明天要上班,唔可以飲得更痛快, 下次再黎,香港會幾多變化, 三聖會不會成為另一個鯉魚門和西貢的翻版呢?
飲多一杯,感覺更加微醉,濛濛瀧瀧下的香港應該是最漂亮的, 特別係飲飽食醉,和一班關注時事的人吃飯,感覺更深, 希望呢度唔會咁快改變吧。
「泰海鮮」
地址:屯門三聖街6號商場地下5至9號及14至16號
沒有留言:
發佈留言