樹熊の食桌: 三不思議

2015年12月29日星期二

三不思議

第一次吃這間餐廳，應該係來太古工作冇幾耐的時候，吃了一餐類似早餐的快餐，有杯飲品，有碗烏冬，有多士，有蛋，那不錯的價錢，是貴到不行的太古周邊的一個幾好選擇。

坦白說，好食就一定唔係，但我覺得以這裡的環境，價錢，食物品質，也是可以站起來繼續做生意的餐廳，對我來說，這裡最多是快餐店，這是太古的一件不可思議之事。

第二次過來，我純粹想和同事坐底飲杯咖啡，想環境清靜又少人的地方，記得上次來早餐十一點多這裡人煙就如海拔四千的合歡山，我忽發奇想，就來坐低飲杯野，當然，一如所料，這附近真係冇人，夜晚的時候就有點如歐洲街道的感覺，那種不可思議的感覺，係你奇怪點怪幾廿座的太古城點解可以有條咁少行人嘅街道。這是太古的第二不思議事件。

第三次過來，就係一位住在華蘭花園的朋友B，佢話叫我食下呢間，因為呢度有平絕全城的日本菜和近似的omakase，好奇心驅使我這個晚上和他來到吃個便飯。坐底一下，真係冇想過原來這個像普通快餐點的格局會有呢個乾坤，就如如果你去茶餐廳的格局然後有私房菜的驚喜一樣，那個絕對係令你上左開心大發現個節目一樣，呢個係三不可思議，我想睇到呢度如果你係呢頭番開工，你會覺得很奇怪，對吧？

三文魚野菜沙律，呢個大碟到不行的沙律絕對有呢個元朗壽司大大碟的氣息，三文魚係肥美而冇乜雪藏味，加上價錢係呢區真係好平，三十幾蚊呢個價應該係元朗都搵唔到。

蒲燒原條鰻魚，現今燒鰻魚好普遍，但要好味唔係度度有，這類的最重要係平得黎個味道唔會將貨就價，當然你不會期望佢燒到好似三河屋或者係秋田個啲level，但咬下去燒鰻魚在口中融化的感覺絕對係一件非常滿足的事，蒲燒燒汁剛剛好得來又唔會太鹹，絕對值得吃。

壽司併盤由朋友去發辦，不過朋友原來都係懶人，佢將呢個重任交左俾師傅，就真係好似omakase咁，當日最新鮮最靚的食物都係你面前，我們叫了三文魚，珍寶赤蝦，八爪魚，鯛魚，三文魚子，鮮帶子，皇帝蟹腳和吉列蝦卷，全部係以三個字形容，平靚正。當中，最喜歡是大大條的皇帝蟹腳，啖啖海水的鮮味，另外三文魚子在口中左爆右爆就如愛情動作片般刺激，珍寶赤蝦絕對是好肉又鮮味。

三文魚子在口中左爆右爆就如愛情動作片般刺激。

三文魚，八爪魚和一眾白身魚水準都唔差。

當中，最喜歡是大大條的皇帝蟹腳，啖啖海水的鮮味。

帶子厚切感覺佳。

吉列蝦卷也是大件乾身又做得不錯。

西班牙黑毛豬野茵意大利麵，最令我驚喜的，應該係呢個意粉，可能係佢以日本的omakase為主，冇特別講佢都有其他野可以選擇，呢個西班牙黑毛豬野茵意大利麵絕對係今晚最搶眼之作，上枱一刻，對唔住，我對佢毫無興趣，就如那些外表不漂亮的女孩子，膚淺的男孩如我們都會係覺得零吸引力，但原來佢好吃得係全晚驚喜中的驚喜，黑毛豬配意大利粉配搭冇錯對我來說幾特別，起碼少見，條條的意粉都沾上豬的油香，還有大量的野茵調整你所吸入的油份，什麼都是意想不到，簡單煮法，簡單材料，但卻異常出色，比以出色的意粉的simplylife更技勝一籌。

牛乳布丁，唯一一個真係非常普通的，應該就是這個甜品，非常普通的質素，牛乳味道好濃烈，但我就麻麻地喜歡，可能前面太過癮，期望大左，自然落差就如永遠不見的分手情侶最遙遠的距離，想起這個牛乳布丁自然想起那個從前的A小姐，就如從沒有認識過的她，現在回想起來，從前在太古城工作的一個月還以為可以終身的她現在就如最不熟悉的陌生人，舊日說多少的情情塔塔說話，大概也如塔利班的問題一樣荒謬和奇怪。