最佳配角

有時候，配角往往出色過主角好多，有些情況，還要出色好多好多，說起配角，羅蘭係表表者。說起七輪燒肉，我就想起羅蘭，還記得電影七月十四嗎，就算影帝劉青雲都冇佢咁搶鏡，龍婆這個配角搶鏡到到而家你可能電影都會唔記得，但你會記得龍婆。這裡的配角海鮮和前菜沙律全都在水準之上，就如羅蘭姐，為七輪燒肉加了不少分數。

芝麻醬菠菜沙律，呢個菠菜沙律份量好少，但配上好多好多的芝麻醬，為我們今晚吃肉的主題殺出一條血路。

雞泡魚乾，食日本菜點少得呢個魚乾呢，可惜今晚要早訓，唔可以飲酒，費事飲太多影響第二朝的精神，不過雞泡魚乾脆得可口，配合沙律醬，絕對係送酒佳品。

薯仔沙律，從來我唔覺得食薯仔沙律好唔吸引，但係呢個薯仔沙律出奇地好食，簡單方程式加上一些脆脆在外邊，開胃都不行。

日本椰菜，呢個最得我心，一大盤的椰菜加上點點的沙律醬，醒神又酸酸地，就算我唔太喜歡日本椰菜也吃過不停。

四式前菜有牛蒡，泡菜，蒜頭和酸蘿蔔，全部係沾上一點的泡菜之辣，泡菜的辣是絕對惹火又醒神，蒜頭和酸蘿蔔都係辣辣地，牛蒡又juicy又鮮甜，我一吃就愛上了。

還有呢個好似中式的拍青瓜的日本青瓜，沒有什麼調味，簡單配合的韓式醬汁，總括幾樣野食都十分開胃，特別係前菜，好似為左你可以食多啲食多而設。

極上霜降和牛刺身，呢個絕對係今晚最出色的肉類，霜降和牛入口係軟身又可以即溶，加左洋蔥，食到嘅係另一種味道。

沒有飲酒送燒肉，反而飲青森來的蘋果汁，驅走熱氣好幫手。

然後就是燒烤的時間了。和牛之盛盒係今晚的主角，有多種和牛部分牛冧肉，牛胸腹，牛脷，牛小排，牛肩，我最喜歡的是牛小排，肥美又好吃，全部牛油份高又香，雖然不是入口就溶，但以一個幾平的價錢吃到那麼多和牛部位，好抵。

幻之豚盛合，個名好靚，而當中最出色係黑豚荔枝卷，爆juicy的荔枝和黑豚夾過打band，其他都係以黑毛橡果豚的部分，當中較喜歡豬肋骨肉和面頰肉較好吃，肩膀肉都好肥美，最普通係舌厚切，但整體黎講，豚盛合反而比和牛合更出色。

別府麻辣雞腿肉，呢個係好滑的雞腿肉，沾上了辣辣的別府麻辣汁，比起和牛，相對我喜歡這個雞的簡單。

青檸岩鹽手羽先，檸檬和鹽夾雜在雞翼中，誰也搶不了誰鏡，手羽先都是單骨，懶人如我絕對讚好。

海鮮係另一個搶鏡的配角，廣島蠔清酒燒，清酒就如烙印般般入廣島蠔中，肥美又好吃。

原隻魷魚，平時我好少吃呢啲高膽固醇之物，但朋友燒得又幾靚，沒有太多的調味，但也好吃又好看。

燒鯖魚，我很喜歡呢件鯖魚，加了檸檬汁，酸酸的味道係魚肉裡面慢慢滲透出來，簡單又美味。

總括成晚，海鮮和沙律前菜都唔錯，有啲都特別出色，整體表現外觀都好過燒肉，配角的出色也蓋過了一些主角的不足，呢度嘅最佳配角，當之無愧。

後記，要留意，這店通風系統普通，不過外面有露天的位置，附近又好泊車，如果有機會冬天過來，係寒冬下燒烤應該好吸引，不過呢度都幾靜，外邊有好多花花草草，夜晚吃特別舒服，如果可以記得坐外邊。

七輪燒肉 Yakiniku Shichirin

西環堅尼地城科士街40號地鋪