庖丁三部曲之一

這篇食評，我想了很多個題目，而最終，庖丁成為是次今晚的主角。

每次吃自助餐，我都會想起他。如果你是那個有過去的七十或八十後，你又點會唔識佢，庖丁解牛，就算你中文會考曾經唔合格，我相信你也很難忘記佢解牛的輕鬆如音樂般的劏牛技巧。你讀TSA冇讀過會考唔明我講乜，唔知庖丁係邊個?那麼你問下有考會考嘅爹地媽咪哥哥姐姐親戚朋友，佢應該係香港人所認識劏牛個個人。

而家自助餐就好似買選老婆咁，好審慎評估，因為人大了，自助餐每次都唔夠膽亂食，因為現在太肥，唔想食太多，而且每次都同自己講，唔好食咁多，但每次都係食到嘔電。朋友約到入屯門食，原因有三個。

1.呢度做個theme叫做韓日台，三個地方啲野我都好鐘意食

2.有個朋友剛剛食完，佢話好平好抵，一定要食，以前細個同家人食個都係食到癲。

3.屯門黃金海岸其實好靚，星期六拍拖或者一班朋友入去可以行下。

好，就入面行下食番個自助餐，難得星期六，食到幾夜都可以，我們一行四人便來到了聆渢咖啡廳。

來到了，本身同自己話食少少就算，點知，見到個場大到爆，野食多到爆，我立即想起你，庖丁，莊子話：“以有涯隨無涯，貽矣”，我知道今晚又係以有涯追無涯，以有限的胃追吃無限供應的食物，食到傻的一個晚上。

要準備大劈一番，當然要有準備，要打開個胃，一定要食酸前菜，仲有沙律，還有吃餐前果有助消化

沙樂美腸，大大碟任你吃，就算主題沒有意大利也大方refill，翻本第一選。

生果有多種，西瓜，士多啤梨，橙，哈蜜瓜，等等，無限供應，由開頭到尾生果都要幾多有幾多，有誠意之作。

泰式鳳爪沙律，未大吃一番前，最好食呢類又酸又辣的東西，為你的肚準備，讓胃口增強。

如果說冷盤最普通的，應該就是韓式泡菜冷麵，沒有平時的爽和辣得起勁，只吃一點便可以。

前菜還有日式芝麻秋葵沙律是我最喜歡之一，奇怪唔太多人食，呢個絕對有助消化。

螺肉和八爪魚都係任你食而又質素不錯的。

沙律菜是任你食，和其他酒店一樣多款。

海鮮當然是第二個番本項目，雖然沒有生蠔沒有龍蝦，但 雪花蟹腳還是不停站供應，大大條的蟹腳起碼吃幾條。

肥大肉厚紐西蘭青口，是我喜歡的一個必選海鮮項目。

還有半殼扇貝，又係冇得輸的項目，不像一些冷盤沒有調味，這裡更加了一點辣辣的調味，整個扇貝更惹火更好味。

自海鮮站上了癮後，我愛上了翡翠螺，當外面最少要差不多十元粒，我又點會唔任食番夠本。

這裡的凍海蝦都是大隻得很，那個肉質鮮嫩爽口，食幾多隻都食唔夠。

魚生方面，最受歡迎的一定是帶子，然後是呑拿魚，三文魚，希靈魚，墨魚，甜蝦和劍魚，當中最喜歡的是帶子和希靈魚，兩個都像平時在高質壽司店開得到的高質般。

四位食，仲要送一板海膽，天啊，可以唔好咁吸引嗎？

裡面的熱食我開頭以為唔太多，當中最喜歡的係龍蝦，龍蝦係有少少辣，大大隻的龍蝦蚶，不得了。

台式三杯雞和薑汁炒時蔬是最好的選擇，三杯雞惹味又好食，就如上次台灣學煮的三杯雞一樣味，然後薑汁炒時蔬食完又食食完又食，清清地唔怕食得多。

對，其實我真係久經訓練個肚又大又小，係見到前菜，沙律，海鮮，熱盤的室內食物令你已經興奮都好緊要，誰知原來下半場半面先別有洞天，那個開放式的自助餐setting叫我目眩。原來part 2才上震撼，如果剛剛庖丁解了牛的前部分，我想外邊應該就係庖丁解牛的最精彩部分。

燒乳豬，當場有師傅係你面前即燒即切，新鮮當然不在話下，肥美有火喉，即燒即切即食，夫復何求。

隔離就有呢個琵琶鴨，又係燒得勁有風味，你好少現場睇埋呢個體驗，鴨肉燒得層層也好靚，最重要係個種燒完就得，又有得睇，又有得食的雙重享受。

呢到除左燒呢幾件好味又好睇的東西外，還有好多值得一試的，也是日本韓國台灣周圍走。

台式香腸點會少得，條條你有胃口食，我會繼續燒，還有燒菠蘿襯托。

燒韓式牛仔骨，呢個絕對燒得美味又juicy，牛肉色香味俱備，牛仔骨大大份，一條有幾舊，大件得一舊可以四人分。

燒野檔口還有燒雞翼係重點推薦，我覺得好比馬來西亞的那檔燒得全球盛名的雞翼，皮脆肉汁多，無敵好。

還有呢度咖哩部分都不錯，薄餅又好好。

每人只取兩隻的清酒木魚花煎虎蝦，完全係燒到靚得如美人般，虎蝦啖啖肉和剛剛冷盤各有千秋，但清酒木魚的清新就自然係有其絕對的吸引力。

韓式炸醬麵，那個是當地吃到的滋味，我就是每次吃韓國野都會食呢個麵。

焗蕃茄沙樂美香腸薄餅，我不知這個屬於邊個地方，但salami加蕃茄的交涉為薄餅帶來無限的可能性。

最重要這裡還有米酒清酒等俾你任飲，你喜愛酒的話就一定喜歡。

天婦羅有蝦有茄子等什錦任你選擇，一定有款適合你。

西冷牛肉，當然是自助餐重點項目，但太多好野食，呢個相對失色。

還有專屬一個counter的燒羊架，就算我唔喜歡食，在座幾位都覺得燒得好好，沒有羊羶味，我又怎會拒絕呢。

外邊雖然好多肉，但係都有菜檔俾你選擇，食乜菜都得，當中有韮菜花係我的最愛。

韓式泡菜海鮮豆腐湯，熱辣辣的海鮮湯足料到震，特別咁凍環境飲暖湯能令你舒緩一點。

燕窩素鮑雞絲粥，綿綿粥底，素鮑多且甜。

新鮮栗米，看到又係冇辦法拒絕，粒粒鮮甜。

朱古力噴泉是必有項目，不過我就睇多過食，呢度好多小朋友，個個都堆著佢。

苞芙仔樣子精美，食幾舊都絕對不為過。

朱古力吉士甜筒的可愛你更不想吃，但還是必定是一個你會喜歡的項目。

雪糕有兩種，呢度有兩種，一個係haggen dazs，一個係movenpick，haggen dazs有我想食左好耐的奶茶味，遇到你實在太遲來，好好味，滑一點的movenpick也是好選擇，兩個都會叫了受不住誘惑食食食。

日式抹茶銅鑼燒還有芝麻雪糕，我會選擇夾埋頭先啲雪糕食。

窩夫基本上係酒店必點項目，相對剛剛好吃的太多，呢個就普通左少少，我自己對窩夫要求較高，如果脆點個心軟一點，應該就會好食一點。

食到呢到，之前說那些什麼食少少，完全忘記得一乾二淨，我就像莊子所說，以有涯隨無涯，貽矣，我的肚子真係貽矣，飽到傻，可能我就像追求庖丁解牛的技巧，追求係食自助餐的境界提醒自己食得像庖丁般輕巧...

但係，當美食當前，你估庖丁真係咁易做?

當晚，食到十點，還有好多枱客人笑笑說說食食，大人細路仔，ladies and gentlemen，也在做庖丁，個個都食到飽，不過咁正的情況下繼續食。

飲自助餐茶時庖丁上身的我，莞爾，滿足就是這樣，以有涯追求了這類美食的無涯。

聆渢咖啡廳 Cafe Lagoon

屯門青山公路1號香港黃金海岸酒店低層地下